Ukrayina Mudafaa nazirliginiñ Baş İstihbarat İdaresi, Sahte malümatnen küreş merkezinen işbirlik yaparaq, «Vovan ve Leksus» duetiniñ azaları Vladimir Kuznetsov ve Aleksey Stolârovnıñ (Malışkin) bilgilerini yayınladı. Olar 2015 senesi qırımtatar Meclisiniñ vekillerine telefon açıp, «Qırımnıñ energetika blokadası»nıñ teşkilâtçıları aqqında malümat almağa tırıştılar.
Baş İstihbarat İdaresi War&Sanctions portalınıñ «Kreml ruporları» bölüginde bu malümatnı yayınladı.
Eki blogcu da Ukrayinanı itibarsızlaştırmaq, Kreml akimiyetine qol tutmaq ve Rusiye askerleriniñ ihtiyacları içün para toplamaq maqsadınen malümat tarqatqan «Vovan ve Leksus» Telegram kanalınıñ müellifleridir.
2014 senesi Kuznetsov özüni «Donbasnıñ halq gubernatorı» Pavel Gubarev olaraq tanıtıp, İğor Kolomoyskıy ve Dmıtro Yaroştan malümat almağa tırışqan edi.
«2015 senesi Qırımtatar Milliy Meclisiniñ vekillerine telefon «oyunları» vastasınen, vaqtınca işğal etilgen Qırımnıñ energetika blokadasınıñ «teşkilâtçıları ve icracıları» aqqında malümat almağa tırıştı», — dep qayd etildi Kuznetsovnıñ bilgisinde. Bu «oyun»nı o, Stolârovnen beraber yapqan edi.
RFnıñ 2022 senesi başlağan tolu miqyaslı istilâsından soñ, olarnıñ «oyunları» cenk aletine çevirildi. Ukrayinağa qoltutqan Rusiye medeniyet erbaplarınen yapılğan subetlerniñ yazıları, cinaiy taqip içün esas olaraq qullanıldı, Kremlge yaqın media vastaları ise bu şahıslarnı «hainlik»te qabaatladılar. Bu faaliyeti içün Stolârov 2024 senesi «Dostluq» ordenine layıq körüldi, 2025 senesi ise duet RF Adliye nazirliginden Anatoliy Koni adına medal aldı.
Bundan ğayrı, olar Ukrayinanıñ vaqtınca işğal etilgen topraqlarını bir qaç kere ziyaret ettiler. 2017 senesi Donetskte «Kim içün telefon çala» kitabını taqdim ettiler, bu kitapta Ukrayinağa qarşı malümat ve memurlarnıñ hususiy belgileri bar edi.
2018 senesi olar işğal etilgen Qırımda yerli studentlernen «yaratıcılıq körüşüvi»ni keçirdiler ve «oyun-jurnalistika» aqqında laf ettiler, 2024 senesi mayıs ayında ise Luğanskta «Kelecek içün tarih. Rus baari» forumına qatnadılar.
Belgileri Ukrayina istihbaratınıñ yayınlağanı teşviqatçılar cedveline «Erkek devleti» aşırıcı ictimaiy areketiniñ tesisçisi, Rusiye blogcusı Vladislav Pozdnâkov kirsetildi. O, Ukrayinağa qarşı tolu miqyaslı Rusiye istilâsına ve ukrayinlılarğa qarşı cenk cinayetlerine, şu cümleden ukrayin askerleriniñ başlarınıñ kesilmesine, faal şekilde qol tutua. Teşviqatçı bir qaç kere işğal etilgen Qırımğe ketti.
Evel UHHUkrayina Havfsızlıq hızmeti, işğal etilgen Simferopolda (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adte) çalışqan teşviqatçı Kostântın Kevorkânğa şübe bildirgen edi. Onı duşmannen işdeşlik yapqanında ve RFnıñ tecavuzına qol tutmaq içün sahte malümatnı tarqatqanında qabaatlaylar. Adam, mülkiniñ musadere etilmesinen, 12 senege qadar apis cezasına mahküm etile bilir.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
