İşğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) mahkeme Rusiye Mudafaa nazirliginiñ arbiy hızmetçisiniñ ölüminiñ sebebi olğan patlavda iştirak etkeninden şübelengen qadınnı apiske aldı.
RİA «Novosti», mahkemeden malümatqa esaslanıp, bu aqqında haber berdi.
Mahkemeniñ malümatına köre, 1994 senesi doğğan Rusiye Federatsiyası vatandaşı eki ayğa apiske alındı. Şübelengen qadınnı «terror aktı» aqqında maddege binaen qabaatlaylar.
Rusiye FSBsiniñ bildirgenine köre, qadın «Ukrayina mahsus hızmetleriniñ vazifesine köre arbiy hızmetçini patlattı». Şimdilik Rusiye tarafı bunıñ resmiy delillerini taqdim etmedi.
Hatırlatamız ki, Cumaaqşamı künü, arman ayınıñ 13-nde işğal etilgen Sevastopolnıñ (Aqyarnıñ) Stoletovskıy caddesinde patlav oldı, onıñ neticesinde bir adam elâk oldı. İlk malümatqa köre, patlatıcı cihaz çöp qopqasında saqlanılğan edi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
