Qırımtatar uquq qorçalayıcısı, sabıq siyasiy mabüsi Leniye Umerova BMTda bildirdi ki, Rusiye ukrayin vatandaşlarına qarşı muntazam sürette qanunsız tutuv, izolâtsiya, uydurılğan qabaatlav ve işkence qullana. O, teşkilâtnı Rusiye Federatsiyasını terroristik devlet olaraq tanımağa ve ukrayin esirleriniñ azat etilmesini talap etmege çağırdı.
Qırımtatar uquq qorçalayıcısı Birleşken Milletler Teşkilâtınıñ Havfsızlıq Şurasınıñ Arriya formulası boyunca keçirilgen resmiy olmağan toplaşuvında bunı bildirdi, dep haber etti arman ayınıñ 10-da «Ukrinform».
Umerova Vladikavkaz ve Beslan apishanelerinde tutulğanı aqqında da tarif etti, azat etilgen soñ onı kene hırsızladılar ve başqa apishanege attılar.
«Menim başıma kelgenler — bu sistemanıñ bir qısmı. Rusiye Ukrayina vatandaşlarını işğal etilgen topraqlarda esirlikte tutmaq içün qanunsız tutuv, izolâtsiya, uydurılğan memuriy ve cinaiy qabaatlav, işkence ve karusel tutuluvlarını qullana», — dep qayd etti o.
Sabıq siyasiy mabüsniñ aytqanına köre, böyle «karusel tutuluvları» insanlarnı tış dünyadan ve advokatlardan marum qaldırğan sistemanıñ bir qısmı ola.
O qayd etti ki, işğal etilgen Qırımda eñ az 84 qadın cinaiy taqipke oğradı, 60 qadın SİZOtaqiqat izolâtorıda ya da apishanede buluna.
Uquq qorçalayıcı halqara toplulıqnı Rusiyeni terroristik devlet olaraq tanımağa ve Rusiye tarafından qanunsız tutulğan bütün ukrayinlerni azat etmege çağırdı.
Hatırlatamız ki, Qırımtatar Milliy Meclisiniñ Reisi Refat Çubarov bildirdi ki, arman ayınıñ 9-nda ve 10-nda Rusiye quvetçileri işğal etilgen Qırımnıñ şimalindeki bir qaç meskün yerinde qırımtatarlarnıñ evlerini tinttiler, em de yarımadanıñ cenübiy yalısındaki camilerden birini tintip, insanlarnı yaqaladılar.
Leniye Umerova aqqında ne bilemiz
2022 senesi ilk qış ayından berli Rf akimiyeti, 25 yaşındaki qırımtatar Leniye Umerovanı qanunsız olaraq tuta edi. Oña qarşı bir qaç memuriy protokol tizdi. Birinci kere sanki vesiqalarını bermegen, bundan soñ sanki telefonını bermegen, bundan soñ da sanki "masadan çıqmağan ve qarşılıq köstergen".
Suspilne Qırım Leniyeniñ ağası Aziz Umerovnen laf etti. Rusiye tarafından ukrain pasportına saip olğanı ve rus pasportından red etkeni sebebinden maküm etilgen qardaşınıñ ikâyesini añlattı.
Qırım uquq qorçalayıcı gruppasınıñ başı Olha Skrıpnık, qırımtatar Leniye Umerovanıñ Rusiyedeki izolâtorda teqvif müddetiniñ uzutılmasınıñ sebeplerini añlattı. Bundan ğayrı, uquq qorçalayıcı, qadınnı işğalcilerden qurtarmağa ve evge qaytarmağa yardım etecek yollarnı bildirdi.
Quralaynıñ 5-inde Moskvadaki Lefortov rayon makemesi, ruslarnıñ Şimaliy Osetiyada 5 ayğa qanunsız olaraq tevqif etkeni qırımtatar Leniye Umerovanı epis etti. Leniye Umerovanıñ qorçalayıcıları, qorçalayıcı tedbirniñ miqdarını iddialaşmağa planlaştıralar.
İlk qış ayınıñ 18-inde Moskvadaki Lefortovo makemesi, qırımtatar Leniye Umerovanıñ qorçalayıcı tedbirniñ uzatılması aqqında taqiqatçınıñ ricasını baqtı. Qırımtatar qadınnı "casuslıq"ta (RF CQniñ 276. maddesi) qabaatlandı. Onıñ tevqif müddetini daa eki ayğa uzatıldı.
2024 senesi kiçik aynıñ 27-sinde rusiye makemesi, qorçalayıcı tarafnıñ Leniye Umerovanıñ tevqif müddetini uzatqan qararğa şikâyetnamesini red etti.
2024 senesi berim ayınıñ 13-nde qırımtatar Leniye Umerova nevbetteki deñişim çerçivesinde qaytarıldı. Onıñnen beraber 48 ukrainalı evge qayttı. Olar Ukraina Silâlı quvetleri, Milliy gvardiya, Milliy polis, Devlet sıñır hızmetiniñ askerleri ve vatandaşlardır.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
