Kör Qırım siyasiy mabüsi Oleksandr Sizikovnıñ Rusiye Federatsiyasınıñ Krasnoyarsk vilâyetindeki Minusinsk apishanesinde tutuluv şaraiti fenalaştı. O, diger mabüslernen beraber daa beter şaraitte bulunğan kamerada tutula.
«Oleksandr Sizikovğa qol tutuv» Telegram kanalınıñ göñüllileri bu aqqında haber ettiler.
Göñüllilerniñ aytqanlarına köre, yañı kamerada radio ve televizor yoq, ayaqyol ise o qadar sıq ki, onı ayaqta qullanmaq kerek. Qapı tamamınen qapatılmay.
Yañı şaraitke baqmadan, Oleksandr zindandaşlarınen vaqıt keçirmege devam ete. Göñüllilerniñ sözlerine köre, biri özüne ve Sizikovğa Artur Konan Doylnıñ «Qızıl Dosya» romanını oquy, siyasiy mabüs ise oña şahmat oynamağa ögretti.
Haber etilgenine köre, mabüsler poçta ve «Zonatelekom» hızmeti vastasınen yollanılğan futbol haberleriniñ yazmalarını oquylar.
Bundan da ğayrı, Minusinsk apishanesinde mabüslerniñ kelirleriniñ 75%-i tutıp alına. Amma, göñüllilerniñ malümatına köre, Sizikov I derece saqatlığı sebebinden zarar körmedi.
Hatırlatamız ki, 2025 senesi mayıs ayınıñ 26-nda Krasnoyarsk vilâyetiniñ Minusinsk şeer mahkemesi 39 yaşındaki Qırım siyasiy mabüsi Oleksandr Sizikovnı azat etti. Hastalığı sebebinden apisten çıqtı.
Orta küz ayınıñ 21-nde Krasnoyarsk vilâyet mahkemesi Sizikovnı azat etme qararını lâğu etip, apishanege qaytarmağa qarar berdi.
Orta küz ayınıñ 23-nde gece «polis» işğal etilgen Qırımnıñ Bağçasaray rayonında onıñ evini tintti ve onı yaqaladı.
Ertesi künü Qırımnıñ işğalli Bağçasaray rayon mahkemesi kör musulmannı «poliske boysunmağanı» içün 10 künge memuriy apis cezasına mahküm etti.
Orta küz ayınıñ 31-nde işğalli Qırım Yuqarı mahkemesi bu «qarar»nı lâğu etti ve onı apisten azat etmek kerek ediler. Amma advokat Emil Kurbedinov onı izolâtordan alıp olamadı.
Boş aynıñ 5-nde advokat bildirdi ki, Rusiye işğalcileri Qırım siyasiy mabüsini Simferopoldaki (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adteki) 1-nci SİZOda tutmağa devam eteler ve onı etap etmege azırlaylar.
Qara qış ayınıñ 8-nde kör Sizikovnı Qırımdan 5 biñ kilometr uzaqlıqta yerleşken Rusiyeniñ Minusink şeerindeki apishanege etap ettiler.
2024 senesi ilk küz ayında Moskva vilâyeti istinaf mahkemesi «Hizb ut-Tahrir davası»nıñ dörtünci Bağçasaray gruppasına qarşı şikâyet arizasını baqmağa devam etti. Onıñ iştirakçileri Alim Sufyanov, Seyran Hayredinov ve kör saqat qırımtatar Oleksandr Sizikovdır. Olar tintüvler ve «mahkeme tahqiqatı» vaqtında yapılğan bir qaç bozuvnı qayd ettiler.
"Hizb ut-Tahrir davası"nıñ dörtünci Bağçasaray gruppası aqqında ne bilemiz
2020 senesi oraq ayınıñ 7-nde Qırımda keçirilgen kütleviy tintüvler vaqtında yedi kişi tutuldı. Aqmescitniñ "Kıyiv rayon makemesi" altı mabüs içün tevqif tedbirini sayladı.
İsmet İbrahimov, Zekirya Muratov, Vadim Bektemirov, Emil Ziyadinov, Alim Sufyanov, Seyran Hayredinov "makeme" zalında apiske alındı ve Aqmescitteki taqiqat izolâtorına yerleştirildi. Birinci gruppa körme saqatlığına saip olğan Oleksandr Sizikov ev apsine alındı.
Tutulğanlarnıñ episi, Rusiyede terroristik olaraq tanınğan, amma dünyanıñ çoq ülkesiniñ milliy seviyesinde sıñırsız faaliyet etken "Hizb ut-Tahrir" islâm siyasiy firqasında iştirak etkeninde qabaatlanalar.
2023 senesi qara ayında "devlet prokurorı" "Hizb ut-Tahrir" davası çerçivesinde Cenübiy bölge arbiy makemesinde Oleksandr Sizikov içün 18 sene rica etti.
2023 senesi mayısnıñ 17-nde Rusiye Federatsiyasınıñ Cenübiy bölge arbiy makemesinde Oleksandr Sizikovnı 17 senege azatlıqtan marum etüv cezasına maküm ettiler. Alim Sufyanov ve Seyran Hayderinov 12 sene sert rejimli müstemlekege üküm etildi. Birinci dört senesini olar da apishanede keçirecekler.
Rusiye makemesi Sizikovnı sert rejimli apishanege yolladı ve apishaneden soñ daa bir buçuq senege azatlıqtan marum qaldırdı, oña cemaat tedbirleri ve toplaşuvlarğa barmamağa emir etti.
2024 senesi berim ayında Moskva vilâyetiniñ istinaf makemesi "Hizb ut-Tahrir davası"nıñ dörtünci Bağçasaray gruppasına qarşı şikâyet arizasını baqmağa devam etti. Onıñ iştirakçileri Alim Sufyanov, Seyran Hayredinov ve körme qabiliyetini coyğan saqatlı qırımtatar Oleksandr Sizikovdır. Olar tintüvler ve "makeme taqiqatı" vaqtında yapılğan bir sıra bozuvlarnı qayd ettiler.
2025 senesi mayıs ayınıñ 26-nde belli oldı ki, Krasnoyarsk vilâyetiniñ Minusinsk şeer mahkemesi hastalığı sebebinden Oleksandr Sizikovnı azat etti. O, Qırımğa qayttı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, «qanunlarğa qarşı faaliyet»te ve böyle degen «cian hilâfeti»ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
