Qırım siyasiy mabüsi Oleksandr Sizikovnıñ anası aytqanı kibi, onıñ oğlunı Rusiye Yekaterinburg üzerinden tranzitnen alıp keteler ve kiçik aynıñ ortasına qadar onı Qırımdan 5 biñ kilometr uzaqlıqta olğan Minusinsk apishanesine etap etmege planlaştıralar.
Siyasiy mabüsniñ anası Olena Sizikova Suspilne Qırımğa telefon vastasınen bunı bildirdi.
"Keçken Cumaertesi künü onı Yekaterinburgğa alıp kettiler. Onı Minusinkke, apishanege alıp keteler. Onı kiçik aynıñ ortasında ketirecekler. Eñ azından onıñ advokatı böyle dedi. Onı Minussinskke qaytarırlar, dep tahmin etken edik. Çünki olar insanlarnı apishanelerge qaytarıp alalar. Saşanı ilk qış ayınıñ 1-nde Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad — terciman) SİZOsından etapqa alıp kettiler", — dep qadın añlattı.
Onıñ aytqanına köre, o, oğlunıñ sağlığı içün qasevetlene ve onıñnen bağ yoq.
"Simferopolda men onı kördim. Oğlum içün bu etap pek qıyın olğanını bilem, oña kimse etapta yardım etmey. Tek apiske alınğanlar yardım ete bile. Saşa Krasnodar ve Volgograd şeerlerinde keçişti. Anda bir qaç qısa telefon bağı bar edi. Amma şimdi onıñnen iç bir bağım yoq. Bir haber bekleyim, belki bir mektüp ya da bir not. Onıñ sağlığı nasıl, şaraiti nasıl olğanını bilmeyim. Şimdi ne para, ne eşya, ne de ilâc yollay bilem", — dep siyasiy mabüsniñ anası añlattı.
Onıñ aytqanına köre, Sizikovnıñ adliyecisi onıñ apishanege qaytarıluvı aqqında qararğa qarşı kassatsiya şikâyetini berdi, amma Rusiye tarafınıñ reaktsiyası ne vaqıt olacağını bilmey.
"O yerge kelmegence, apishane müdiri haber etmeli, amma resmiy mektüp eki ayğa qadar süre bile. Soñki sefer Krasnodarğa çıqarılğan soñ, bir afta evel, Saşa apiske alınğan yerniñ apishane yolbaşçısından mektüp keldi. Şimdilik onıñ bulunğan yeri ve vaziyeti aqqında bir şey aytıp olamadılar. Advokat, Krasnoyarsk vilâyeti mahkemesiniñ Minusinsk mahkemesiniñ Oleksandrnı azat etmek qararını lâğu etip, onı apishanege qaytarmaq qararını lâğu etkenine qarşı kassatsiya şikâyetini berdi. Amma şimdi bayramlar bar, cevap ne vaqıt olacağını bilmeymiz", — dep qadın qoştı.
Hatırlatamız ki, işğal mahkemesi tarafından 17 yıl apis cezasına mahküm etilgen kör Qırım siyasiy mabüsi Oleksandr Sizikov ilk qış ayınıñ 1-nde Simferopol (Aqmescit) SİZOsından etapqa çıqarıldı.
2025 senesi mayısnıñ 26-nda Rusiye Federatsiyasınıñ Krasnoyarsk vilâyetiniñ Minussinsk şeer mahkemesi Oleksandr Sizikovnı hastalıq sebebinden apisten boşatqanı belli oldı. O, Qırımğa qayttı.
Orta küz ayınıñ 21-nde Krasnoyarsk vilâyet mahkemesi Sizikovnıñ azat etilüv qararını lâğu etip, apishanege qaytarmağa qarar berdi.
Orta küz ayınıñ 23-nde gece "polis" onı işğal etilgen Qırımnıñ Bağçasaray rayonında tintti ve yaqaladı.
Ertesi künü Qırımnıñ işğalli Bağçasaray rayon mahkemesi kör musulmannı "poliske boysunmağanı" içün 10 künge memuriy apis cezasına mahküm etti.
Orta küz ayınıñ 31-nde işğalli Qırım Yuqarı mahkemesi bu "qarar"nı lâğu etti ve onı apisten boşatmaq kerek ediler. Amma advokat Emil Kurbedinov onı izolâtordan alıp olamadı.
Boş aynıñ 5-nde advokat bildirdi ki, Qırım siyasiy mabüsini Rusiye işğalcileri Simferopolnıñ (Aqmescitniñ) 1-inci SİZOsında tutmağa devam eteler ve onı etap etmege azırlaylar.
"Hizb ut-Tahrir davası"nıñ dörtünci Bağçasaray gruppası aqqında ne bilemiz
2020 senesi oraq ayınıñ 7-nde Qırımda keçirilgen kütleviy tintüvler vaqtında yedi kişi tutuldı. Aqmescitniñ "Kıyiv rayon makemesi" altı mabüs içün tevqif tedbirini sayladı.
İsmet İbrahimov, Zekirya Muratov, Vadim Bektemirov, Emil Ziyadinov, Alim Sufyanov, Seyran Hayredinov "makeme" zalında apiske alındı ve Aqmescitteki taqiqat izolâtorına yerleştirildi. Birinci gruppa körme saqatlığına saip olğan Oleksandr Sizikov ev apsine alındı.
Tutulğanlarnıñ episi, Rusiyede terroristik olaraq tanınğan, amma dünyanıñ çoq ülkesiniñ milliy seviyesinde sıñırsız faaliyet etken "Hizb ut-Tahrir" islâm siyasiy firqasında iştirak etkeninde qabaatlanalar.
2023 senesi qara ayında "devlet prokurorı" "Hizb ut-Tahrir" davası çerçivesinde Cenübiy bölge arbiy makemesinde Oleksandr Sizikov içün 18 sene rica etti.
2023 senesi mayısnıñ 17-nde Rusiye Federatsiyasınıñ Cenübiy bölge arbiy makemesinde Oleksandr Sizikovnı 17 senege azatlıqtan marum etüv cezasına maküm ettiler. Alim Sufyanov ve Seyran Hayderinov 12 sene sert rejimli müstemlekege üküm etildi. Birinci dört senesini olar da apishanede keçirecekler.
Rusiye makemesi Sizikovnı sert rejimli apishanege yolladı ve apishaneden soñ daa bir buçuq senege azatlıqtan marum qaldırdı, oña cemaat tedbirleri ve toplaşuvlarğa barmamağa emir etti.
2024 senesi berim ayında Moskva vilâyetiniñ istinaf makemesi "Hizb ut-Tahrir davası"nıñ dörtünci Bağçasaray gruppasına qarşı şikâyet arizasını baqmağa devam etti. Onıñ iştirakçileri Alim Sufyanov, Seyran Hayredinov ve körme qabiliyetini coyğan saqatlı qırımtatar Oleksandr Sizikovdır. Olar tintüvler ve "makeme taqiqatı" vaqtında yapılğan bir sıra bozuvlarnı qayd ettiler.
2025 senesi mayıs ayınıñ 26-nde belli oldı ki, Krasnoyarsk vilâyetiniñ Minusinsk şeer mahkemesi hastalığı sebebinden Oleksandr Sizikovnı azat etti. O, Qırımğa qayttı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
