İlk yaz ayında rusiye turoperatorları müterilerge işğal etilgen Qırımğa lâğu etilgen tahminen 30 biñ putövka içün tahminen 1,5 mlrd ruble (738,3 mln ğrn) qaytardılar. Lâğularnıñ esas sebebi logistika meselesi oldı: Simferopol ava limanı qapalı, trenlerniñ sayısı qısqartıldı, elektrik energiyası söndürile ve yaqarlıq qıtlığı bar.
Oraq ayınıñ 27-nde RF turoperatorları birleşmesi (ATOR) Telegramda bu aqqında haber berdi.
«Bundan ğayrı, ruslarnıñ bir qısmı paralarını yüksek faizli bank esalarında qaldırmaq daa yahşı olacağını tüşünip, tatillerni başqa tarihqa keçirmege qarar aldı. Şahsiy fors-major adiseler de oldı», — dep qayd etildi haberde.
Birleşmeniñ vitse prezidenti Sergey Romaşkinniñ sözlerine köre, para keri ala bilgen turistler tatilni red etken bütün türistlerden 15%-ini teşkil ete — çoqusı başqa yerlerge ketmege qarar aldı. İlk yaz ayında tahminen 24 mlrd ruble masraf etken 600–650 biñ turist yarımadanı ziyaret etti.
Oraq ayınıñ başında Rusiye turoperatorları birleşmesi RF ükümetini Qırım musafirhanelerine lâğu etilgen putövkalar içün paralarnı daa uzun müddet içinde, 2026 senesi ilk qış ayınıñ 31-ne qadar, qaytarmağa ya da tatil tarihlarını deñiştirmege izin bermege rica etti.
Travelline sistemasınıñ malümatına köre, Qırımda yedek olaraq ayırılğan yerlerniñ 79%-i, Sevastopol (Aqyar) şeerinde 71%-i lâğu etildi.
Bunda evel Qırım şarap işhaneleriniñ saipleri satışlarınıñ 99%-ini ğayıp etkenlerini bildirdiler. Yaraqlıq qıtlığı, elektrik energiyası bozulğanı, hadimler yetmezligi ve kurort mevsimi bozulğanı sebebinden işğal etilgen Qırımdaki şarapçılıq buhranğa oğradı, dep haber berdi Forbes Russia.
Yaqarlıq qıtlığı sebebinden bağlarnıñ bir qısmını endi elnen işlemek mecbur olalar. Yarımadada yüzüm cıyuv mevsimi arman ayınıñ ortasında başlar, faqat bazı şarapçılarnıñ fikirlerine köre, bu sene yüksek fiyatlar sebebinden bereket toplamaycaqlar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
