Elektrik energiyası ve yaqarlıq berilüvi cedvelini şekillendirmek imkânsız — Aksönov

İşğalli Qırım yolbaşçısı Sergey Aksönov, benzin stantsiyasında er kün benzin satıluvı ve yaqarlıq berilüviniñ tam cedveli olmaycağını bildirdi. Aynı zamanda yarımadada elektrik energiyasınıñ berilmesi cedvelini qurmaq imkânsızdır. Qırımnıñ bazı meskün yerleri 12 künden berli elektriksiz qala.

Oraq ayınıñ 13-nde Telegramda o, bunı bildirdi.

"Daa biraz kerginlik devam etecek. Teessüf ki, er kün benzin satıluvı ve tam gaz berüv cedveli kefil etilmeycek. Bugün Qırım Cumhuriyeti toprağında elektrik energiyasınıñ berilüviniñ tam cedvelini tizmek imkânsızdır... Soqaq yarıqlarınıñ söndürilüvi mesken evlerde elektrik energiyasınıñ tarqatıluvına tesir etmese de, bütün belediye qurulışlarında o qısqartılır", — dep qayd etti Aksönov.

Onıñ aytqanına köre, generatorlarnı teslim etüv cedveli tizildi. Eñ çoq elektriksiz qalğan yerler ilk nevbette baqılacaq. Hususan, olardan bazılarınıñ elektrikler yoq olğanı 12 künden ziyade qayd etile.

"Gaz ballonları aqqında. Men bu meselenen tanışım, onı istegenlerniñ sayısını bilem. Yaqın vaqıtta malümat beririm. Bu yönelişte vatandaşlarğa destek köstermek içün qarar alınacaq", — dep qayd etti Qırım "başı".

Hatırlatamız ki, Rosstatnıñ malümatına köre, oraq ayınıñ birinci aftasında işğal etilgen Qırımda yaqarlıq fiyatı 78,4%-ge paalılaştı. İşğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) benzin qıtlığı ve elektrik energiyası söndürilgeni sebebinden şahsiy sektor sakinleri içün ballonlı gaznıñ yetmemezligi qayd etile. FortPost işğalli neşiriniñ bildirgenine köre, yerli sakinler benzin olmağanı sebebinden gaz ballonlarını toldurıp olamaylar, bazıları ise açıq ateşte aş pişirmek mecburlar.

Ukrayinanıñ maqsadı — ruslarnıñ cenübiy logistikasını kesmek, çünki vaqtınca işğal etilgen Qırım toprağından "Dnepr" taqımınıñ teminatını keçe. RBKğa intervyusında Ukrayina Prezidenti Ofisiniñ yolbaşçısı Kırılo Budanov bunı ayttı.

Bundan evel Milliy muqavemet merkezi, işğalciler Ukrayinanıñ VİETa, hususan Qırımğa, yaqarlıq ketirmek içün yañı gizli usullarnı qıdırmağa tırışqanlarını bildirdi. Rusiye arbiy hızmetçileri öz bölüklerini yaqarlıqnen temin etmek içün vatandaş naqliyatını qalqan olaraq qullanalar.

Читати ще