Oraq ayınıñ birinci aftasında işğal etilgen Qırımda yaqarlıq fiyatı 78,4%-ge paalılaştı. Hususan, Aİ-95 benzininiñ fiyatı şimdi litrine 170,59 ruble (bu, litrine 99 ğrıvnâ), yani fiyatı 92%-ge arttı.
Deutsche Welle, Rosstatnıñ malümatına esaslanıp, bunı bildirdi.
Yarımadada benzin satıluvı da sıñırlana. Hususan, oraq ayınıñ 10-nda işğal etilgen Sevastopoldaki (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki addaki) yedi benzin stantsiyasında 20 litrden ziyade yaqarlıq satılmay, dep bildirdi şeerniñ işğalli gubernatorı Mihail Razvojayev.
Razvojayevniñ bildirgenine köre, yaqarlıq içün yañı QR-kod berüv sisteması azırlanıla. O, kodlarnıñ er künki resmiyleştirilüvinden vazgeçmege imkân berecek: qayd etilgen qullanıcılar avtomatik olaraq benzin almaq aqqını ala bilecekler.
O şunı da qayd etti ki, Qırım sakinleri benzin almaq içün aynecilik yapalar. Hususan, öz maşinalarını gece yaqarlıq stantsiyasınıñ yanında qaldırıp, saba benzin toldurmaq içün keller. İşğalli memurnıñ aytqanına köre, Sevastopolda (Aqyarda) benzin qıtlığı ve elektrikler kesilgeni sebebinden daa bir mesele peyda oldı — şahsiy sektor sakinleri içün gaz ballonları yetmey.
İşğalli FortPost neşiriniñ bildirgenine köre, yerli sakinler de şikâyet eteler.
Yerli sakinler benzin olmağanı sebebinden gaz ballonlarını toldurıp olamağanlarından şikâyet eteler, bazıları ise ateş yaqıp, aş pişirmek mecbur.
"Biz şahsiy sektorda yaşaymız, biz gaz ballonlarını qullanamız. Bazılarınıñ endi gazı yoq, ve insanlar aateş yaqıp, aş pişireler, çünki benzin yoq, ve gaz almağa ketip olamaysıñ. Akimiyet sovet zamanında olğanı kibi, bağça cemiyetlerine ballonlarnıñ ketirilmesini teşkil etmeli", — dep ayttı ForPost muarririyetine oquyıcılardan biri.
Bundan da ğayrı, neşirniñ malümatına köre, 40 litrlik şişeniñ fiyatı 2 biñden 5 biñgece arttı, şimdi ise — 7 250 rublegece.
Hatırlatamız ki, işğalciler Ukrayinanıñ vaqtınca işğal etilgen topraqlarına, hususan Qırımğa yaqarlıq ketirmek içün yañı gizli usullarnı qıdırmağa tırışalar. Rusiye arbiy hızmetçileri öz bölüklerini yaqarlıqnen temin etmek içün vatandaş naqliyatını qalqan olaraq qullanalar. Bunı Milliy muqavemet merkezi bildire.
İşğalciler Qırımğa yaqarlıq taşığan quru astyapılar yoq etilgen soñ, deñiz üzerinden naqliyatnı qullanmağa tırıştılar.
RF kölge flotunıñ tankerleri ücümleri aqqında ne bilemiz
Hatırlatamız ki, oraq ayınıñ 9-nda saba İSQ künde 14 geminiñ zarar körgenini bildirdi. Rusiye Rostov vilâyetiniñ gubernatorı Yuriy Slüsar da eki tankerniñ ücüm etilgenini bildirdi.
Oraq ayınıñ 8-nde 9 gemi, oraq ayınıñ 7-nde ise 10 (tankerler, quru yük taşıyıcısı ve parom), oraq ayınıñ 6-nda eki tanker ücüm etildi.
"Bütün tankerler Rusiye Federatsiyasınıñ "kölge flotu"nıñ qısmı ola ve halqara sanktsiyalarğa oğray, dep qayd etti Robert Brovdi. Hedefler, yañı qurulğan İnsansız sistemalar quvetleriniñ Teren ücüm merkeziniñ koordinatsiyası altında zarar kördi", — dep qayd etti İnsansız sistemalar quvetleriniñ komandanı Robert "Madâar" Brovdi.
Ukrayina Mudafaa nazirligi Azaq deñizinde Rusiye tankerleriniñ zarar körgenini böyle izaatladı.
"Lâkin Qırım sakinlerini ihtar etmek kerekmiz — benzin olmaycaq, beklemey bilesiñiz. Oyun tek başlana. Bularnıñ episi İnsansız sistemalar quvetleriniñ "quşları" ve Ukrayina havfsızlıq hızmetiniñ işidir", — dep qayd etildi haberde.
Ukrayinanıñ maqsadı — ruslarnıñ cenübiy logistikasını kesmek, çünki vaqtınca işğal etilgen Qırım toprağından "Dnepr" taqımınıñ teminatını keçe. RBKğa intervyusında Ukrayina Prezidenti Ofisiniñ yolbaşçısı Kırılo Budanov bunı ayttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
