Ukrayina ükümeti, 1991 senesi arman ayınıñ 24-nden soñ VİETda, hususan Qırımda doğğan vatandaşlarğa, devlet cedvellerinde malümat olmasa bile, Ukrayinağa qaytmaq içün şahsiy şeadetnameni elde etmege imkân berecek bir yıllıq deñev leyhasını başlattı.
Leyhanıñ başlatılması aqqında Ukrayina halq mebusı Tamila Taşeva bildirdi.
Onıñ aytqanına köre, yañı mehanizm, işğal ya da mecburiy köçürüv neticesinde qanuniy vesiqaları olmağan ve Ukrayinanıñ kontrol etkeni topraqlarğa qanuniy şekilde çıqmaq imkânını ğayıp etken genç ukrayinlerniñ qaytmasını qolaylaştırmaq kerek.
"1991 senesi arman ayınıñ 24-nden soñ vaqtınca işğal etilgen topraqlarda doğğan vatandaşlar Ukrayinağa qaytmaq içün şahsiyet kâğıtlarını resmiyleştire bileler. Devlet cedvellerinde olar aqqında malümat olmasa bile", — dep Taşeva bildirdi.
Vesiqanı Türkiye, Gürcistan, Ermenistan, Qazahistan ve diger memleketlerde Ukrayina diplomatik müessiselerinde bedava resmiyleştirmek mümkün olacaq.
Devlet cedvellerinde olğan malümatlar şahısnı belgilemege yetersiz olsa, yaqın soy-soplar onı tasdıqlay bilirler. Bunıñ içün video bağı vastasınen ameliyatnı uzaqtan keçirmege imkân bar. 16 yaşını toldurmağan balalar içün arizanı ana-babaları ya da qanuniy vekilleri bere bilirler.
Mebusnıñ aytqanına köre, işğalde çoq vaqıt olğan gençler içün qarar hususan emiyetlidir.
"Gençlerni qaytaruv ceetinden bu qarar kerçekten de esas adımdır, insanlarğa işğalden qurtulmaq içün kerçek bir şans bere", — dep Taşeva qayd etti.
O, mehanizmniñ azırlanmasında iştirak etken ükümet hadimlerine, diplomatlarğa ve cemaat sektorınıñ vekillerine teşekkür bildirdi.
"Er bir ukrayinalı şunı bilmeli: devlet, eñ qıyın şaraitte bile evge qaytmaq yolu açıq qalması içün er şey yapa. Çünki bizim esas küreşimiz — insanlar içün küreştir", — dep halq mebusı qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
