İlk yaz ayınıñ 4-nde gece maalinde Ukrayina silâlı quvetleriniñ insansız sistemalar quvetleri işğal etilgen Qırımnıñ Yürkine civarında Keriç boğazında Qırım köprüni qorçalağan "Svitlâk" sıñır qaravul gemisiniñ zarar körgenini bildirdi. Anda işğalciler bulunğanı sebebinden telükelerniñ yoq etilmesi içün sistematik iş alıp barıla, ve o devam etecek.
İlk yaz ayınıñ 5-nde Ukrayina Silâlı quvetleriniñ Arbiy-deñiz quvetleriniñ nutuqçısı Dmıtro Pletençuk bunı bildirdi.
"Rusiye FSBniñ yalı qorçalağan gemilerinden biriniñ ateşten zarar körmesi aqqında malümat şimdilik teşkerile, malümatnıñ tasdıqlanmasını bekleymiz", — dep o qayd etti.
Pletencuknıñ aytqanına köre, bu üçünci dereceli gemi, büyük ihtimalnen, Keriç boğazındaki Qırım köprüniñ qoruvını temin ete edi.
O, Keriç keçitiniñ Ukrayina tarafından resmen qapatılğanına baqmadan, vatandaş gemileriniñ navigatsiyasını nezaret ete edi.
"Amma körgeniñiz kibi, anda esasen ruslar bulunğanları sebebinden telükelerni yoq etmek içün sistematik bir iş alıp barıla. Bu, bu kanalnıñ suvlarında ilk zarar körgen şey degil. Bundan evel Arbiy-deñiz quvetleri bu suvda devriye turğan bölüklerge de ücüm etti. Ve bu iş devam etecek", — dep ADQniñ nutuqçısı qayd etti.
İSQniñ komandanı Robert ("Madâr") Brovdi bildirdi ki, ilk yaz ayınıñ 4-nci gecesi işğal etilgen Qırımda Ukrayina Silâlı Quvetleriniñ İnsansız sistemalar quvetleri "Svitlâk" sıñırcı qaravul gemisi, lokomotivlar ve RSBN-4N radiotehnik yaqın navigatsiya sistemasın ücüm etti.
Hatırlatamız ki, çiçek ayınıñ 30-na keçer gecesi USQniñ Arbiy-deñiz quvetleri Qırım köprüni qoruyğan RF katerlerine ücüm etti. Bundan ğayrı, afta devamında ukrayin arbiy hızmetçileri "İskander", RLS ve silâ anbarlarına da ücüm ettiler.
Ukrayina Silâlı quvetleriniñ Baş ştabınıñ bildirgenine köre, işğal etilgen Qırımda ilk yaz ayınıñ 2-de gece ukrayin arbiy hızmetçileri Canköy civarındaki Vıdne qasabasında "Pantsir-S1" zenit raketa-top kompleksini urdı. Bundan da ğayrı, ilk yaz ayınıñ 2-de İnsansız sistemalar quvetleri ücüm etilgen bu kompleks ve diger arbiy obyektlerniñ zarar körgenini köstergen videolarnı kösterdi.
Mayıs ayında işğal etilgen Qırımda eñ az 18 kün ve gece devamında patlavlar, uçucısız uçaq aletleriniñ ücümi ve Rusiye arbiy obyektlerine ücümler qayd etildi. Ukrayina mudafaa quvetleri Rusiye ordusınıñ raketa kompleksleri, radiolokatsiya stantsiyaları, silâ anbarları, AM sisteması, ava limanı astyapısı, neft bazaları ve logistika bölükleriniñ zarar körgenini bildirdi.
Aynıñ soñunda ücümler neticesinde yarımadada benzin qıtlığı peyda oldı ve onıñ satıluvı sıñırlandı. Mayıs ayında yarımadada yüz bergen felâketlerniñ hronologiyasını Suspilne Qırım maqalesinde oquñız.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
