Ruslar ağır hasta olğan Qırım siyasiy mabüsi Lenur Halilovnı tüzetüv müstemlekesinden Arhangelsk vilâyetindeki FCHniñ İdaresiniñ bölge hastahanesine alıp kettiler. Soñki üç afta devamında adamnen bağ yoq edi.
Siyasiy mabüsniñ apayı Umida Hudoyberdiyeva "Qırım birdemligi"ne bunı bildirdi.
"Küçü yoq, er şey yoq dep ayta. Onı başqa bir hastahanege alıp ketmege isteyler, anda mahsus onkologiya ekimleri baqa bile. Yalıñız ağrı kesici, analgin berile. Başqa bir şey yoq. O, ara-sıra arabağa otura, ayatı içün pek qorqam", — dep Umida Hudeyberdiyeva tarif etti.
Onıñ aytqanına köre, aqayı üç aftadan berli bağlanmay edi, onıñ telefon muracaatları ise çoq vaqıt devamında qabul etilmey edi. Çiçek ayınıñ ortasında qadın Rusiye devlet hızmeti "Devlet hızmetleri"nden haber aldı. Anda aytılğanı kibi, bu sene çiçek ayınıñ 1-nde Rusiye sağlıq nazirligi Lenur Halilovğa III gruppa saqatlığını belgiledi ve oña "imtiyazlı tibbiy mahsulatnı temin etüv aqqı"nı berdi.
"Ne içün siyasiy mabüs alâ daa kerekli ilâclarnı almay — belli degil", — dep "Qırım birdemligi" yazdı.
Qanunsız apiske alınğanına qadar Lenur Halilov Aluşta rayonınıñ İzobilne köyünde "Aluşta" mustaqil musulman cemiyetiniñ reisi edi. O, diniy bayramlarnı teşkil ete, qorantalarğa cenaze ve tantanalı merasimlerde yardım ete, cemiyetke er künlik yaşayışta yardım ete edi.
2019 senesi onı Qırımdaki miqyaslı tintüvlerden soñ yaqaladılar, Rusiye Federatsiyası Cenübiy bölge arbiy mahkemesi Halilovnı "Hizb ut-Tahrir davası"nda Aluşta gruppası çerçivesinde "terroristik gruppası"nıñ teşkilâtçısı olaraq tanıdı. Lenur Halilov qanunsız alda sert rejimli müstemlekede 18 yılğa üküm etildi.
2024 senesi arman ayınıñ 20-nde İsakogorsk rayon mahkemesiniñ qararına binaen, o, müstemlekede apis cezasından sağlıq vaziyeti sebebinden azat etildi. Onıñ hastalıqları Rusiye Federatsiyası ükümetiniñ 54-nci qararınen tasdıqlanğan cedvelge kirsetile, oña köre, insan "umumiy rejimli müessisede tutulamaz" ve ihtisaslı tibbiy müessisede tedaviylevge muhtac.
Arman ayınıñ 23-nde evine, Qırımğa qayttı. Orta küz ayınıñ ortasında Arhangelsk vilâyet mahkemesi prokurornıñ muracaatını qanaatlendirip, Halilovnı apishanege qaytarmağa qarar berdi, boş aynıñ 7-nde ise Halilovlarnıñ evine Aluştadan işğalli uquq qoröakayıcılarından dört kişi keldi.
Halilovnıñ advokatı Emil Kurbedinov orta küz ayınıñ 14-nde Arhangelsk vilâyet mahkemesiniñ musulmannı müstemlekege qaytarmaq qararına qarşı kassatsiya şikâyetini berdi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
