İşğal etilgen Qırımdan sistemalı sürette boğday çıqarğan «ZAID» Rusiye gemisi Sevastopolda 35,8 biñ tonna boğday yüklep, Türkiyeniñ İskenderun limanına yol ala. Seyaat vaqtında gemi öz AİS transponderini söndürdi ve öz yerini gizlemek içün spoufing qullandı.
«Mırotvorets» merkeziniñ «SeaKrime» leyhasınıñ jurnalisti Katerına Yaresko bu aqqında haber etti.
Yayınlanğan malümatqa köre, «ZAİD» (İMO: 9715270) gemisi qural ay 10-dan 19-ğa qadar Sevastopolda 21-nci sanlı pristan yanında olıp, anda 35 800 tonna boğday yükledi. Bundan soñ o, yük içün sahta vesiqalar bermek içün Rusiyeniñ Kavkaz limanına kirdi.
Monitoringde aynı vaqıtta qural ay 7-den 20-ge qadar gemi öz AİS transponderini söndürgenini qayd ettiler. 20–22 qural ay devamında signal faal edi, amma mahkeme sebebinden sistema Kerç yanında yalan yerni köstere edi. Gemiden işançlı signal tek qural ay 22-de peyda oldı.
Monitoring gruppalarınıñ malümatlarına köre, 2023 senesinden başlap «ZAİD» tek işğal etilgen Sevastopoldan İran, Suriye, Mısır ve Türkiyege boğday taşuv içün çalışmaqta.
Bundan da ğayrı, qayd etile ki, 2026 senesi çiçek ayında gemi endi Mısırğa boğday ketirmege tırışqan, amma Ukrayina ve Mısır prezidentleri arasındaki muzakerelerden soñ, İskenderiye rayonından çıqıp, Türk İskenderunğa yol alğan, anda onı limanda qabul ettiler.
Ukrayina Mudafaa nazirliginiñ Bİİ portalındaki malümatqa köre, 2025 senesi boş ay 25-te Ukrayina ZAID gemisine sanktsiyalar qoydı. 2025 senesi ilk qış ayı 19-da Avropa Birligi oña qarşı sanktsiyalar kirsetti, 2026 senesi kiçik ay 13-te ise sanktsiyalarğa İsveçre qoşuldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
