İşğal etilgen Qırımda Rusiye Federatsiyası kontrolindeki mahkeme "devlet hainligi" davası çerçivesinde üküm çıqardı. Canköy rayonınıñ 42 yaşındaki sakini 17 yılğa üküm etildi.
İşğalli Qırım prokurorlığı bunı bildirdi.
Qabaatlayıcı tarafnıñ malümatına köre, adam "mahsus arbiy operatsiyağa qarşı edi" ve içtimaiy ağlar vastasınen Ukrayina havfsızlıq hızmetiniñ vekili ile yazışqan edi". Onıñ aytqanına köre, oña "silâ, tehnika ve mudafaa inşaatlarınıñ yerleştirilüvi aqqında malümat toplamaq vazifesi berildi".
2024 senesi devamında o, "arbiy uçaqlar ve naqliyatnıñ foto ve video çeküvini yaptı" ve toplanğan malümatnı "Rusiye Federatsiyasınıñ menfaatlarına qarşı qullanmaq içün" çetel devletiniñ vekiline berdi, dep müessise bildirdi.
Mahkeme oña sert rejimli müstemlekede 17 yıllıq apis cezasını ve 1 yıl 6 aylıq apis sıñırlavını tayin etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
