2026 senesiniñ başından berli Rusiye müessiseleri işğal etilgen Qırımdaki qanunsız arheologik qazmalarnıñ keçirilmesine eñ az 56 izin berdi. Daa 11 böyle izin Zaporijjâ, Herson, Luğansk ve Donetsk vilâyetleriniñ vaqtınca işğal etilgen topraqlarına dair berildi.
İnsan aqları bölge merkezi (İABM) bu aqqında haber etti.
İABMniñ analitikleri ve mütehassıslarnıñ malümatına köre, "açıq mektüpler" aqqında malümat BMTnıñ Ukrayinada insan aqları nezaret missiyası içün toplandı.
Merkez qayd etti ki, şimdi arheologik işlerniñ azırlıq basamağı devam ete. Rusiye müessiseleri endi ekspeditsiya gruppalarını teşkil ete ve halqara gumanitar uquq normalarına zıt kelgen Ukrayina tarafınıñ razılığı olmadan Rusiye Federatsiyası Medeniyet nazirligi vastasınen vesiqalarnı resmiyleştire.
İABMniñ qayd etkenine köre, qazma işleriniñ teşkil etilmesinde iştirak etken müessiseler arasında RİARusiye ilimler akademiyasınıñ Qırım Arheologiya İnstitutı, Moskva Pedagogika Devlet Universitetiniñ Artesian Arheologik Ekspeditsiyası ve Devlet Ermitajınıñ Mirmekiy Ekspeditsiyası bar.
Aq qoruyıcılar qayd eteler ki, Rusiye işğal etilgen topraqlarda ukrayin medeniy mirasını saip etüv ve deñiştirüv siyasetini devam ete. Hususan, Rusiye cedvellerinde medeniy obyektlerniñ ğayrıdan qayd etilmesi, rekonstruktsiyalarnıñ keçirilmesi ve hırsızlanğan müzey eksponatlarınıñ teşviqat sergilerinde qullanılması aqqında söz yürsetile.
Hatırlatamız ki, Poloniya ve Belarusiye arasındaki deñiştirüv çerçivesinde Poloniya apishanesinden azat etilgen Rusiye arheologı Aleksandr Butâgin işğal etilgen Keriçteki qanunsız qazma işine qaytacaq.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
