Rusiyede "devlet hainligi"nde qabaatlanğan Qırım sakini Viktoriya Serğeyeva FSB hadimleriniñ basqısı altında alınğan şaatlıqtan vazgeçkenini bildirdi. Qadın, Rusiyeniñ SİZOlarında aylarca izolâtsiya altında tutılğanı, ruhiy basqı ve işkencege oğrağanını bildirdi.
Qırımtatar resurs merkeziniñ idarecisi Zarema Bariyeva bunı bildirdi.
Onıñ aytqanına köre, 55 yaşındaki Qırım sakini 2025 senesi arman ayınıñ 21-nde Soçi ava limanında İstanbuldan kelgen soñ tutuldı. Bundan soñ onıñ ile bağ yoq oldı.
"Aqrabaları ve yaqınları beş ay devamında onıñ bulunğan yeri aqqında bir şey bilmey ediler. Yaqın vaqıtta tuvğanları qadın qanunsız apiske alınğanını ögrene ve bir qaç aydan soñ Voronej vilâyetindeki Borisoglebsk SİZOda tutula", - dep bildirdi Bariyeva.
QRMniñ malümatına köre, Soçige kelgen soñ qadınnıñ telefonı çekildi ve USQni maliye etkeninde qabaatlandı. Sergeyeva, para yiberüvlerni blok etken bank ilâvelerini qullanmağanını iddia ete.
"Eki aftadan soñ Qırımlı qadınnıñ apiske alınuvı başlandı, olar aman-aman er eki afta devam ete edi, şu cümleden poliske boysunmağanı içün. Mahsus penitentsiar müessisesiniñ sıñırından çıqıp olamayıp, onı kene apiske aldılar ve yañı protokol esasında kene kamerağa qaytardılar", — dep Bariyeva qayd etti.
Bariyeva, SİZOda bulunğan vaqıtta qadın sert yanaşuv ve basqığa oğrağanını bildirdi. Krasnodarğa avuştırılğan soñ, o, evel berilgen şaatlıqtan vazgeçip oldı.
"Tek anda o, oğluna ve qızına qarşı yapılğan basqı ve qorquzuvlar neticesinde bergen bütün şaatlıqlarından vazgeçkenini bildirip oldı. Viktoriya qorqmayıp, küreşecegini bildirdi, çünki iç bir vaqıt yapmağan cinayetleri içün onlarca yıl Rusiye apishanesinde oturmağa istemey. Tam olaraq aytsaq, Rusiye Ceza qanunnamesiniñ 275-inci maddesine istinaden devlet hainliginde qabaatlavnı Qırımlı apiske alınğanından tek 5 ay keçken soñ bildirildi", — dep Bariyeva añlattı.
Читати ще
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
