İşğal etilgen Qırımdaki "Taygan" arslanlar bağçasında arslanlar, ziyaretçilerniñ közleri ögünde, qadın arslanğa ücüm etip, onı parçaladılar. Bu, park idaresiniñ ayvanlarnı tutmaq şaraitini bozmağa devam etkeni sebebinden oldı.
Radio Svobodanıñ "Qırım.Aqiqat'' leyhasınıñ jurnalistlerine ayvan qorçalayıcı anonimlik şartınen bunı bildirdi.
"Aslanlar eki qarışqan sürüni qışta yaşağan yerlerinden boşatqan soñ, olar birinci kün park ziyaretçileriniñ közleri ögünde uruşlar keçirgenler. Qayd etmek kerek ki, "savan"da bir buçuq yetişken arslan ve tek eki qadın arslan bar edi. Aslanlar tam birisini yaraladı. Eñ qorqunçlısı şu ki, o, soñki müddetlerde hamile edi ve aslanlar onıñ qarnını yırttı. Bu ölümcül yaralar", — dep ayvan qoçalayıcı tarif etti.
"ÇP Krım" Telegram kanalında video derc etildi.
Şimdi, "Qırım.Aqiqat"nıñ haber etkenine köre, ayvan qorçalayıcılar "Taygan" arslanlar bağçasını teşkermek içün kütleviy muracaat azırlaylar.
"Ziyaretçiler tarafından qayd etlgen videolarda ve park memuriyetiniñ areketleri ve areketsizligi, Rusiye Federatsiyasınıñ Memuriy cinayetler qanunnamesiniñ 8.53-ünci maddesine köre, memuriy cinayet alâmetlerini taşıy (ayvanlarnı medeniy-idman maqsatlarında tutmaq ve qullanmaq talaplarını bozmaq), em de Rusiye Federatsiyasınıñ Ceza qanunnamesiniñ 245-inci maddesine köre, cinaiy areket alâmetlerini taşıy bile (ayvanlarğa qarşı sert davranuv). Esirlikte aslanlarnıñ tecavuzını toqtatmaq içün, ayvanlarnıñ areket tarzı aqqında ilmiy bilgilerni ve olarnıñ şaraitini eyileştirmek içün ameliy tedbirlerni birleştirgen kompleks yanaşuv kerek. Lâkin "Taygan" arslanlar bağçasında ayvanlarnı tutuv şaraitini eyileştirmek içün tedbirlerniñ keçirilmesi imkânsızdır, çünki tesisçi Zubkov O. A. litsenziya talaplarına riayet etmege ve nezaret organları tarafından berilgen tenbi ve emirlerni yerine ketirmege red ete", — dep ayvan qorçalayıcılarnıñ muracaatında qayd etildi.
Ne Oleg Zubkov, ne de işğalli Qırım akimiyeti şimdilik izaat bere.
Hatırlatamız ki, işğal etilgen Qırımda "Taygan" arslanlar bağçasınıñ reberligi ayvanat bağçasınıñ faaliyetinde tabiat qoruv qaidelerini ve qaidelerini körmemezlikke ura, dep çiçek ayında "Qırım.Aqiqat" yazdı.
"Taygan arslanlar bağçasında er vaqıt bir şeyler yaqalar, ve, duman töşegine köre, sanayı miqdarında. Ekologlarnıñ qayd etkenine köre, "Taygan"nıñ büyük meseleleri bar — mesken çöplükniñ toplanuvı ve biologik çöplükniñ qullanuvı. Bütün bular etraftaki tabiatqa büyük zarar ketire, ve "Taygan" arslanlar bağçasınıñ bir çoq telükeli maddesi yerastı suvlarnen beraber Qırımnıñ cenübiy-şarqındaki suv ihtiyaclarını temin etken Taygan yapma gölüne tüşkenini köz ögüne alsaq, telüke miqyası birden bir qaç Qırım bölgesini qaplap ala", — dep ekolog tarif etti.
Parknıñ saibi Oleg Zubkovnıñ aytqanına köre, bütün qabaatlavlar esassızdır, çünki obyektni mahsus hızmetler daima teşkere.
Hatırlatamız ki, daa evel "Qırım.Aqiqat" jurnalistleriniñ bildirgenlerine köre, işğal etilgen Qırımda ayvan qorçalayıcılar Yaltadaki şahsiy ayvanat bağçası ve Oleg Zubkov idare etken "Taygan" arslanlar bağçasından ayvanlarnıñ ğayıp oluvından qasevetleneler.
Qayd etilgenine köre, onıñ yarımadağa işğal etilgen Ukrayinanıñ topraqlarında qanunsız sürgün etilgen ayvanlarnıñ çoqusı ayvanat bağçalarında yoq.
Oleg Zubkov aqqında ne bilemiz
"Taygan" Qırım arslanlar bağçası ve "Skazka" Yalta ayvanat bağçasınıñ saibi Oleg Zubkov 2014 senesine qadar Ukrayina vatandaşı edi. Qırım işğal etilgen soñ işğalli akimiyet içün çalışmağa başladı.
2022 senesinden başlap Qırımğa qıtaiy Ukrayinanıñ işğal etilgen topraqlarından ayvanlarnı alıp ketken edi. Daa evel Suspilne Qırım, Oleg Zubkov bildirdi ki, ukrayin ayvanat bağçaları içün eñ büyük ayvanlarnı ketirdi. Beş maşinada 120 ayvan işğal etilgen yarımadağa ketirildi, olarnıñ arasında maymunlar, leyopardlar, develer, qaplanlar, arslanlar, papağanlar, antiloplar ve qoñur ayuvlar bar edi. O vaqıt o, ayvanlarnı qıtaiy Ukrayinağa 15 kere ketirgenini iddia etken edi ve Geniçesk civarındaki Arabat belinde yerleşken ayvanat bağçasınıñ aman-aman episi avuştırılğan edi.
2024 senesi işğalciler Herson vilâyetiniñ işğal etilgen qısmındaki "Askaniya-Nova" biosfera qoruğından zebranı çıqardılar. Olarnı Qırımğa "Taygan" safari parkına ketirdiler. Bu sebepten o Herson prokurorlığı nezaret etken cinaiy davalarda iştirak ete — Ukrayina ayvanat bağçaları ve qoruqlarından ayvanlarnıñ hırsızlanuvı içün cinaiy cinaiy madde boyunca 7 yıldan 15 yılğa qadar apis cezası belgilene.
Keçken qış Oleg Zubkov aslanlarnı yılnıñ suvuq mevsiminde açıq avada qaldırdı, olarnı gecelemek içün mahsus donatılğan sıcaq ocaqlarğa avuştırmadı. Yerli ayvan qoruyıcılar Zubkovnıñ ayvanlarnıñ sağlığını telükege oğratqanını iddia ete ediler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
