Qırım "Tayğan" arslanlar parkı ve "Skazka" Yalta ayvanat bağçasınıñ saibi Oleğ Zubkov, öz ayvanat bağçaları içün Ukrainanıñ vaqtınca işğal etilgen topraqlarından eñ çoq ayvannı ketirdi. Beş maşinada 120 ayvan işğal etilgen yarımadağa ketirildi, olarnıñ arasında maymunlar, leopardlar, deve quşular, kaplanlar, arslanlar, papağanlar, antiloplar ve qoñur ayuvlar bar edi.
İlk qış ayınıñ 22-nde Qırım.Aqiqat neşiri bu aqqında haber etti.
"Zubkov işğal etilgen ayvanat bağçalarınıñ çaresiz vaziyetinden faydalanmağa devam ete. Bu vaziyette Geniçeskte turistler yoq, yani ayvanat bağçasına kelgenler yoq, para da yoq, ayvanlarnı tutmaq paalı. İşte, ayatlarını saqlamaq içün ayvanat bağçasınıñ saibi öz ayvanlarını pek ucuz bermege mecbur", — dep Qırım.Aqiqatqa Qırım ayvanat qorçalayıcısı anonim şekilde izaatladı.
Oleğ Zubkovnıñ malümatına köre, bu onıñ Rusiye tarafından işğal etilgen Ukraina qıtasında bulunğan ayvanat bağçalarından ayvanlarnı qıdırğan 15-inci seferidir. Geniçesk civarındaki Arabat belinde yerleşken ayvanat bağçasınıñ aman-aman episi avuştırıldı.
"Zubkov bedava alğan ayvanlarnı, Şerhan arslanı kibi, ilk fırsatta satmağa azır olğanınen belli. Şunıñ içün, Zubkovğa ayvanlar berilse, o olarnı tezden satıp, ya da 20 ayuvnen olğanı kibi, atıp yoq ete bilir", — dep qoşa ayvan qorçalayıcısı.
Ayvanlarnı qanunsız alıp ketüvden ğayrı, Oleğ Zubkov işğalcilernen işbirlik faaliyetinen bağlı cinaiy davalarda iştirak ete. Qırım MCdeki Ukraina Havfsızlıq hızmetiniñ Baş idaresi bu malümatnı #LiberateCrimea areketiniñ faalcisine bildirdiler, dava 2020 senesi saban ayında başladı, dep añlattılar.
Telegram, WhatsApp ve Facebookta Suspilne Qırım haberlerine abune oluñız
