Mayısnıñ 14-nde Ukrayina Yuqarı Şurası halqara toplulıqqa tamır qırımtatar halqınıñ genotsid fedalarınıñ hatırasını añmaq ve Rusiye tarafından Ukrayinanıñ vaqtınca işğal etilgen topraqlarında aq ve serbestliklerniñ bozuluvına cevap bermek içün ğayretlerni birleştirmek muracaatını qabul etti. 272 mebus buña qol tuttı.
Facebookta halq mebusı Tamil Taşeva bunı bildirdi.
"Bu vesiqa qırımtatar halqınıñ sürgünliginiñ 82 yıllığı arfesinde qabul etildi. Bizler 1944 senesiniñ facialı vaqiaları aqqında er yıl dünyağa hatırlatma ananesini devam etemiz, o vaqıt biñlernen qırımtatarı sovet akimiyeti tarafından zorbalıqnen sürgün etilüv ve genotsid fedası oldı. Eñ qorqunçlısı şu ki, bu repressiyalar alâ daa devam ete. Kommunistik totalitar rejimi halqımıznı bedeniy ceetten yoq etmege tırıştı, soñra şeer ve köylerniñ adlarını deñiştirerek, onıñ hatırasını silmege tırıştı. Bugün Rusiye Federatsiyası bu müsemleke siyasetini devam ete, qırımtatarlarnıñ taqip etilmesi, Meclisniñ yasaq etilmesi ve insan aqlarınıñ bozuluvını kimligimizniñ yoq etilmesi içün qullana", — dep Taşeva yazdı.
Qararda ükümetler, parlamentler ve halqara teşkilâtlarnı şuña çağıra:
- 1944 senesi tamır qırımtatar halqınıñ sürgünligini genotsid olaraq çetel devletlerniñ ükümetleri ve parlamentleri seviyesinde tanımaq
- Qırımnı ilhaq etmek ıntıluvlarını tanımama siyasetini sert bir şekilde tutmaq
- işğalli rejimniñ ayırım ameliyatlarını ve tamır halqnıñ taqip etilmesini takbih etmek
- hususan Avropa insan aqları mahkemesiniñ ve BMTnıñ İnsan aqları eyyetiniñ işğal etilgen Qırımda bozuvlarnen bağlı qararlarını yerine ketirmek içün Rusiyege qarşı diplomatik, sanktsiyalar ve siyasiy basqını quvetleştirmek
- Ukrayina siyasiy mabüsleriniñ, qanunsız tutulğan arbiy hızmetçileriniñ ve vatandaşlarnıñ azat etilmesi içün ğayretlerni birleştirmek
- Halqara cinaiy mahkemeniñ faaliyetine qol tutuvnı quvetleştirmek ve Ukrayinağa qarşı tecavuz cinayeti boyunca Mahsus mahkemeni meydanğa ketirmek
- 2014 senesinden berli Rusiye tecavuzından ketirilgen zararnıñ tazminatını qaplap almaq içün halqara tazminat mehanizminiñ vekâletini kenişletmek
- Ukrayinanıñ Avropa Birligine aza olmasına ve halqara havfsızlıq formatlarına qoşulmasına qol tutmaq
"Saylav neticeleri mebus korpusınıñ bu meselede birdemligini köstere: 272 adam qol tuttı, 0 adam qarşı çıqtı, ve 0 adam bitaraf oldı, toplaşuvda: 307 adam bar edi. Bu qarar qırımtatar halqınıñ facialı tarihına nisbeten ürmet kösterüv ve halqara ortaqlarımızğa açıq bir işaret ola: Qırım ve onıñ halqı içün küreş adaletli barışıq içün umumiy küreşimizniñ ayırılmaz bir parçasıdır. Ukrayina Yuqarı Şurasınıñ reberligine, profil eyyetleriniñ azalarına, bütün Ukraiyna halq mebuslarına devlet nezar noqtası içün minnetdarlığımıznı bildiremiz", — dep Facebookta Qırımtatar Milliy Meclisiniñ reisi Refat Çubarov yazdı.
Bugün Latviya, Litvaniya, Kanada, Poloniya, Estoniya, Çehiya Cumhuriyeti ve Felemenk parlamentleri Ukrayinanen birlikte 1944 senesi sürgünlikni genotsid olaraq tanıdı. 1944 senesiniñ sürgünligini ve halqımıznıñ aqlarınıñ bozuluvını takbih etken Lüksemburg parlamentine de minnetdarmız.
Читати ще
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
