İşğal etilgen Qırımda Rusiye akimiyeti bala lagerlerini teşviqat, balalar ve gençlerge mefküreviy tesir aleti olaraq qullanmağa devam ete.
Ukrayina prezidentiniñ Qırım Muhtar Cumhuriyetindeki temsilciligi bunı bildirdi.
İşğal etilgen yarımadada bu yaz Rusiyede ilân etilgen "halqlarnıñ birligi yılı" çerçivesinde "milliy medeniyet ve ananeler"niñ ögrenilmesine bağışlanğan bala lagerlerinde eñ azdan dört profil deñişüvi keçirilmesi planlaştırıla.
Temsilcilikniñ malümatına köre, böyle tedbirler vaqtınca işğal etilgen topraqlarda balalarğa olğan mefküreviy tesirnen bağlı sistematik siyasetniñ bir qısmıdır. İşğalli akimiyet Rusiye devlet siyasetine sadıqlıqnı şekillendirmek içün tasil ve medeniy formatlarnı qullana.
Bundan da ğayrı, zapt etilgen "Artek" bala merkezini halqara ve içki teşviqat platforması olaraq qullanmağa tırışuvlar qayd etile. Hususan, "dünya yaşlar festivali" çerçivesinde işğalciler ilk yaz ayınıñ 21-den oraq ayınıñ 12-e qadar "Balalar — barışıq içün" dünya balalar konferentsiyası"nıñ keçirilmesi aqqında ilân ettiler.
Hatırlatamız ki, çeşit memleketlerden kelgen balalar, Rusiyeniñ Ukrayinağa qarşı cenkine ve halqara sanktsiyalarına baqmadan, işğal etilgen Qırımda "Artek" lagerini ziyaret etmege devam eteler. Jurnalistler ve uquq qorçalayıcılar, teşviqat programması alâmetleri olğan "halqara deñişmeler"de Avropa gençleriniñ iştirak etkenini qayd eteler.
Suspilne Qırımnıñ malümatına köre, böyle seyaatlarnıñ teşkil etilmesi içün grantlar, cemaat teşkilâtları ve "Rusiye evleri" ağı qullanıla bile, ve işğalden soñ lager özü gençler arasında Rusiye ikâyeleriniñ tarqatıluvı içün alet oldı.
Telegram, WhatsApp, Facebook, TikTok ve YouTubede Suspilne Qırım haberleirne abune oluñız
