Rusiye balkeri MİHAİL NENASHEV (IMO: 9515539) ketken limanını Tartus (Suriye) şeerine deñiştirdi. O, çiçek ayınıñ 22-nden 25-ne qadar ruslar tarafından işğal etilgen Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) limanına yüklengen 27 biñ tonnadan ziyade boğdaynı taşıy. Daa evel qayd etilgenine köre, gemi Mısırğa hırsızlanğan ububatnı alıp ketecek edi.
Çiçek ayınıñ 29-nda SeaKrime leyhasınıñ jurnalisti Katerına Yaresko X içtimaiy ağında bunı bildirdi.
"Cinayetçi işğal etilgen Sevastopolda çiçek ayınıñ 22-25 künleri "Avlita" ububat terminalına yüklengen 27400 tonna boğdaynı taşıy. Zaporijjza, Herson vilâyetleri ve Qırım Muhtar Cumhuriyetiniñ işğal etilgen topraqlarından ububattır. Suriye şimdi işğal etilgen Ukrayina limanlarından Rusiye gemileri tarafından ketirilgen hırsızlanğan ububatnı qabul ete, ububatnı ise devlet şirketi satın ala. Akimiyet deñişken soñ hırsızlanğan ububat satuv toqtatıldı, amma tezden episi qayttı", — dep jurnalist ayttı.
Daa evel haber etilgenine köre, MİHAIL NENASHEV gemisi Bosforğa yol ala. Geminiñ maqsadı İskenderiye (Mısır) limanı olğanına baqmadan, gemiler Suriyege yol ala edi.
Çiçek ayınıñ 29-nda Tış işler naziri Andriy Sıbiğa bildirdi ki, tek 2026 senesi qara-çiçek ayları devamında 25 Rusiye gemisi Ukrayinanıñ VİETdaki qapalı limanlarından üçünci memleketlerniñ limanlarına 50 doğru sefer yaptı. Bu müddet devamında işğal etilgen Ukrayina topraqlarından 850 biñ tonnadan ziyade ububat ihrac etildi. Bu miqdarnıñ 50%-den ziyadesi qanunsız şekilde Sevastopol (Aqyar) şeeriniñ qapalı limanından çıqarıldı. Daa 13%-i Azaq deñiziniñ Mariupol ve Berdânsk limanlarından yollanıldı.
"Rusiye transponderlerni söndürerek, koordinatlarnı deñiştirerek ve gemiden gemige yüklemelerni yapıp, hırsızlanğan ukrayin ububatınıñ qanunsız satıluvını gizlemek içün mesüliyetten qaçmağa tırışqanını köremiz. Biz bunı körmemezlikke urmaycaqmız. Ukrayina, Halqara deñiz teşkilâtı (IMO) çerçivesinde Qara ve Azaq deñizlerinde qapalı deñiz limanları meselesini ardı-sıra kötermekte", — dep nazir ayttı.
Onıñ aytqanına köre, Ukrayinanıñ ububat hırsızlavınen bağlı acınıqlı tarihiy tecribesi bar, şunıñ içün Rusiyeniñ kölge ububat flotuna qarşılıq köstermek içün ğayretini quvetleştirecek.
"Memleketimiz açlıqtan — Holodomordan, halqımızdan ububat alınğanından — genotsidni başından keçirdi. Bütün qurulış ve memleketlerge, bizim birleşmemizden hırsızlanuvğa sert bir şekilde cevap berecegimizni bildiremiz. Bu sebepten Ukrayina, Rusiyeniñ gizli ububat flotuna qarşılıq köstermek içün ğayretlerini quvetleştirir, bu hırsızlıq ve qanunsız ticaretnen bağlı olğan er keske qarşı AB, G7 ve diger devletlerde yañı sanktsiyalar kirsetecek. Biz ortaqlarımıznen beraber mütenasip cedvellerni yañartmaq ve adresli ve sert sıñırlavlarnı temin etmek içün çalışacaqmız", — dep Sıbiğa qoştı.
Ukrayina Mudafaa nazirliginiñ istihbarat baş idaresiniñ malümatına köre, MIKHAIL NENASHEV yük balkeri 2022 senesiniñ başından başlap "Sevastopoldan ukrayin ububatınıñ sistematik hırsızlanuvı"nen oğraşa edi ve geminiñ Ukrayina devlet sıñırını bozıp, qapalı Qırım limanına kirgenini gizlemek içün AIS signalı söndürilgen vaqıtta onı İran ve Suriyege ihrac ete edi.
"Ukrayinada geminiñ kapitanına 2023 senesinden başlap 2024 senesi qara qış ayına qadar Ukrayina qanunlarını ve halqara deñiz uquqını bozıp, qanunsız olaraq qapatılğan Sevastopol deñiz ticaret limanına kirgenini/çıqqanını şübe bildirdi. Limanda gemi, tecavuzcı memleket tarafından Ukrayinanıñ VİETndan izinsiz alınğan ve soñra qanunsız sürette Ukrayina tışına çıqqan ububatnen toldurıldı. Gemi kapitanı bu müddet içinde eñ az 6 qanunsız sefer yaptı", — dep Bİİ bildirdi.
Ukrayina istihbaratı bildirdi ki, gemi sanktsiyalarğa oğrağan Rusiye devlet gemi qurucılığı "Birleşken gemi qurucılığı" şirketinen bağlı. Ububatnıñ yollayıcısı — 2022 senesi kiçik aynıñ 3-nde qurulğan "Pallada" Rusiye şirketi, o, ububatnıñ toplu ticaretinde ihtisaslaşqan ve "Grumant" (IMO 9385879) gemisinen VİE Qırımdan "ukrayin ububatınıñ hırsızlanuvına alâqası olğan" ola.
2025 senesi ilk qış ayının 19-nda AB MIKHAIL NENASHEV gemisine qarşı sanktsiyalar kirsetti, 2026 senesi qara qış ayınıñ 13-nde ise — İsviçre sanktsiyalarnı kirsetti.
Bundan ğayrı, "Tartus" limanına Rusiye arbiy kontingentini temin etken "Oboronlogistika" şirketiniñ SPARTA gemisi (IMO: 9268710) kete, dep Yaresko qoştı.
Bundan evel Putin Mısırda Rusiye mahsulatınıñ tarqatılması içün "ububat ve energetik merkezi"niñ teşkil etilmesini teklif etken edi. Aynı vaqıtta Ukrayina prezidenti Volodımır Zelenskıy bildirdi ki, Mısır Rusiye tarafından vaqtınca işğal etilgen Ukrayina topraqlarından çıqarılğan ububatnı qabul etmeycek.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
