Çiçek ayınıñ 27-nde İrpin şeerinde "Öksüz içün. For Orphan" — Qırım ressamı ve siyasiy mabüsi Boğdan Ziza ve Kremlniñ diger ukrayin mabüslerine qol tutuv malümat-sanat vaqiası olıp keçti.
IRPIN Bridge sanat alanınıñ Facebook saifesinde bu aqqında haber etildi.
"İrpin, qırımtatar ressamınıñ Boğdan Ziza tarafından yaratılğan "Öksüz" adlı resmi peyda olğan daa bir şeer oldı. Bugün (çiçek ayınıñ 27-nde — muar.) "Öksüz içün. For Orphan" — Qırım ressamı ve siyasiy mabüsi, em de Kremlniñ diger ukrayinalı mabüslerine qoltutuv malümat-sanat tedbiri olıp keçti", — dep haberde qayd etildi.
Tedbir vaqtında ziyaretçilerge Boğdan Zizanıñ ikâyesi tarif etildi, "Öksüz"niñ ğayesi ve obrazını taqdim etken ressamnıñ çıqışı oldı.
İrpin ressamları öz eserlerini taqdim ettiler, olarnı bir kompozitsiyağa topladılar.
Soñra bediiy qısmı oldı: şeer binalarından birinde soqaq sanatınıñ yaratılması. Aynı zamanda iştirakçiler interaktiv bir alanğa qoşuldılar: şifreler yardımınen qoltutuv kartlarını yarattılar ve siyasiy mabüslerge mektüpler yazdılar.
Boğdan Ziza işğalciler tarafından barışıqlı narazılığı içün müstemlekede 15 yılğa qanunsız şekilde mahküm etildi: 2022 senesi mayıs ayında Yevpatoriyada (KezlevRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adde) Rusiye ordusınıñ Buçadaki cinayetlerine qarşı narazılıq olaraq işğal memuriyetiniñ binasını sarı ve mavı boyanen boyaladı.
"Öksüz içün. For Orphan" — Qırım ressamı Ziza ve Rusiye tarafından işğal etilgen Qırımnıñ bütün sakinlerine qoltutuv kampaniyasıdır. O, Ukrayinada ve tışında haber tedbirleri ve cemaat çıqışlarını birleştire.
Müellif — qırımtatar ressamı — adını aytmay.
Boğdan Ziza aqqında ne bilemiz
2022 senesi mayıs ayınıñ 20. künü qırım ressamı ve faalcisi Boğdan Zizağa qarşı "terror aktını yapmağa ıntıluvı" aqqında cinaiy dava açıldı. Onı şübeleyler ki, mayıs ayınıñ 16. künü işğalli şeer memuriyetiniñ binasını boyanen boyaladı ve onı yaqmağa tırışqan.
Bozarğan aynıñ 6. künü Rostov-na-Donudaki Cenübiy bölge arbiy makemesi qırım ressamı ve faalcisi Boğdan Zizanı 15 senege maküm etti.
Bozarğan aynıñ 10. künü Ziza açlıq ilân etti. O, rusiye vatadaşlığından marum etmesini ve ukrain siyasiy mabüslerini azat etmesini talap etti. Bozarğan aynıñ 27. künü açlıq çekmege bitirdi.
Ukrain repçisi Artem Loik, 15 senege maküm etilgen ressam ve faalcini destek etmek içün video çıqardı, çünki Ziza soñ sözüni aytqanda repçiniñ "Krıla" ("Qanatlar" - terciman) yırından sözlerni qullandı.
Qırımda apis etilgen Kezlevli ressam Boğdan Zizanıñ şerefine ukrain ressamları trenni resimlernen yaraştırdılar.
2023 senesi berim ayınıñ 27. künü Vlasıha şeerindeki Arbiy apellâtsiya makemesi, qırım ressamınıñ 15 senelik ükümini deñiştirmeyip qaldı.
Boş aynıñ 12. künü siyasiy mabüsniñ mektüp dostu ondan mektüp alıp haber berdi ki, Boğdan Ziza Perm şeeriniñ 29. müstemlekesine etap etile. Bundan evel arqabaları, etap devrinde qayda bulunğanını bilmegen ediler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
