Vaqtınca işğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) çiçek ayınıñ 23-ne keçer gecesi patlavlar oldı. İşğalli akimiyet, Şimaliy taraf, İnkerman ve Balıqlava rayonlarında 15 dronnı tüşütgenini bildirdi.
Şeerniñ Rusiye kontrolindeki "gubernatorı" Mihail Razvojayev bunı bildirdi.
O şunı da qayd ete ki, şeerniñ vatandaş astyapısı zarar körmedi.
Aynı vaqıtta "Qırım yeli" Telegram kanalı, şaatlarnıñ malümatına esaslanıp, Qaçı ve Belbek ava limanları civarında küçlü patlavlar aqqında haber etti.
Yerli Telegram kanalları Sevastopolğa (Aqyarğa) Bağçasaray tarafından dronlarnıñ areket etüvi, şeer üzerinde dronlarnıñ qayd etilüvi ve farqlı rayonlarda patlavlar aqqında yazdı.
Hatırlatamız ki, çiçek ayınıñ 22-ne keçer gecesi Ukrayina Mudafaa quvetleriniñ bölükleri Sevastopolda (Aqyarda) Rusiye Federatsiyasınıñ Qara deñiz flotunıñ "Streletskiy" arbiy gemileriniñ areketini idare etüv noqtasına ücüm etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
