Qırımda işğalli FSBFederal Havfsızlıq hızmeti, Yaltanıñ 33 yaşındaki sakini tutqanını bildirdi. İşğalciler onı "devlet hainligi"nde qabaatlaylar, madde 20 yılğa qadar apis cezasını belgiley.
TASS Rusiye devlet agentligi bunı bildirdi.
İşğalli tahqiqatnıñ malümatına köre, adam "Ukrayina havfsızlıq hızmetiniñ vekillerine Telegram vastasınen Rusiye Qara deñiz flotunıñ obyektleri aqqında malümat bere edi".
"Qabaatlanğan adamğa qarşı Rusiye FSBniñ Qırım Cumhuriyeti ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad — terciman) şeerindeki idaresiniñ taqiqat bölügi, Rusiye Federatsiyasınıñ Ceza qanunnamesiniñ 275 maddesine istinaden (devlet hainligi) cinaiy dava açtı. Madde 20 yılğa qadar apis cezasını belgiley. Qabaatlanğan adamğa qarşı tutuluv şeklinde qorçalayıcı tedbir alındı", — dep haberde qayd etildi.
Rusiye kütleviy haber vastaları Qırım sakininiñ şahsiy malümatı ve tutuluv tarihı aqqında haber etmey.
RİA "Novosti Krım"nıñ Telegramında derc etilgen videoda qanunsız tutulğan kişiniñ yüzü gizlengen ve sesi deñiştirilgen.
"Tutulğan adam kamera ögünde bir kere Sevastopol-Yalta yolunda, yalı kenarı boyunca ketkende, deñizdeki geminiñ fotoresmini çıqarğanını ve bu resimni subetlerden birine yollağanını tanıdı. Bundan soñ ise bunı yapqanını tüşündi. Böylece, itirafında işdeşlik yapmağanını qayd ete, çünki tutulğan adam ne içün qanun bozğanını bilmey edi. Bundan ğayrı, añlamaq müim ki, yalıdan bir qaç kilometr uzaqlıqta yaldağan geminiñ fotoresmi umumen gizli malümat olmaz", — dep "Tribunal. Qırım epizodı" leyhasınıñ uquq qorçalayıcıları qayd ettiler.
Evel ''Tribunal'' qayd etti ki, tolu miqyaslı cenk başlanğan soñ rusiye quvetçileri daa çoq yerli sakinni tutıp, ''devlet hainligi'' ya da ''casuslıq''ta qabaatlamağa başladılar.
"Baarniñ bir buçuq ayı devamında o, böylece tutulğan beşindi adamdır. Aynı zamanda bu kibi davalar çerçivesinde insanlar zorbalı ğayıp ola, mahkeme oturışıları tamamınen qapalı, bu ise qabaatlayıcı tarafnıñ bu insanlarnıñ qabaatınıñ delilleriniñ qanunlığı ve aqiqiyligine qıymet kesmege imkâñ bermey", — dep haberde qayd etildi.
Daa evel işğalli prokurorlıq, Rusiye quvetçileri tarafından "devlet hainligi"nde qabaatlanğan 32 yaşındaki Yalta sakinine qarşı cinaiy davanı açqanını bildirdi. İşğalli qurulışnıñ bildirmesinde aytıla ki, o, "2023 senesiniñ ortasında Ukrayina Mudafaa nazirliginiñ Baş istihbarat idaresiniñ vekili ile bağ tuttı". 2023 senesi boş ayda adam "kurator"dan Sevastopol (Aqyar) şeerinde arbiy tehnikanıñ yerleştirilüvi aqqında malümat toplamağa ve bermege vazife aldı.
Rusiye quvetçilerniñ bildirgenine köre, "qabaatlanğan adam video çıqardı, em de Sevastopolda arbiy gemilerniñ ve Yalta civarında arbiy tehnika yerleşüviniñ planlarını çizdi".
Bundan da ğayrı, keçken afta işğalciler, "Ukrayina mahsus hızmetlerinen işbirlik" sebebinden "devlet hainligi"nde qabaatlanğan Yalta sakinine qarşı davanıñ mahkemege berilgenini bildirdiler. Rusiye tahqiqatınıñ versiyasına köre, 2024 senesi yazda adam "Ukrayina havfsızlıq hızmetiniñ vekili ile bağ qurdı". O, "Rusiye uquq qorçalayıcı organlarından birisiniñ bulunğan yerini maşinada yerleştirilgen kamera vastasınen qayd etkeni"nde qabaatlana. İşğalli tahqiqatnıñ bildirgenine köre, o, bu malümatnı "messencerlerlerden biri vastasınen" yolladı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
