İşğal etilgen Qırımda Rusiye quvetçileri, Rusiyede yasaq etilgen "Hizb ut-Tahrir" islâm siyasiy firqasına alâqası bar olğanında qabaatlap, apay-aqay Remzi ve Esma Nimetulayevlerni qanunsız sürette apiske aldılar. Ana-babası da uydurılğan davalar boyunca "apiske alınğan" soñ beş küçük qız tuvğanlarınıñ nezareti altında qaldı.
Remzi Nimetulayev 2023 senesi arman ayınıñ 24-nde qanunsız sürette işğalciler tarafından apiske alındı. Adamnıñ zenaatı qurucı edi, amma Qırım işğal etilgen soñ siyasiy mabüslerge qol tuta, qırımtatarlarğa qarşı "mahkemeler"ge bara edi. Rusiye onı "terrorizm"de qabaatlay.
Onıñ anası Hatice Nimetulayeva, quvteçilerniñ evlerine kirgenlerini hatırlay.
"Arman ayınıñ 24-nde saba saat 4:00te, bir adam kelip qapını açsa da, qoradan keçtiler. Yoq, er kes qoradan aşmaq kerek edi. Olar qapını qaqtılar. Olar açtılar. Esmanıñ anası ve qızları anda musafirlikte ediler. Onı alıp kettiler. Er kes şaştı, dörtünci qızım bir aydan berli qışqırıp, gece yuqlap olamadı", — dep qadın hatırlay.
Aqayı qanunsız alda tutulğan soñ Esma beş küçük qızı ile yalıñız qaldı. Şekerci olğan o, ev aşlarını pişire ve böyle yaşay edi. Hatice dey ki, bu istidatnı torunları da miras olaraq aldılar.
"Esmacıqnıñ altın elleri bar edi. O, eñ yahşı şerekcidir, ve birinciden, mükemmel bir anadır. Qızlarını pek seve, olarnı yahşı terbiye ete edi. Aile ceetinden mükemmel ediler", — dep Hatice ayttı.
Esma Nimetulayeva işğalciler tarafından qanunsız olaraq 2025 senesi orta küz ayınıñ 15-nde apiske alındı. Rusiye onı "Hizb ut-Tahrir"nen alâqası bar olğanında qabaatladı. Esma Nimetulayevanen beraber o künü quvetçiler daa üç qadınnı — Nasiba Saidova, Fevziye Osmanova ve Elviza Aliyevanı — tuttılar. Qadınnıñ aytqanına köre, cemaat şaştı.
"Balalarnıñ er kün körmeleri ve qonuşmaları kerek olğan baba bar. O, yanımızda degil, onı sadece qapattılar, uydurılğan sebeplerden apiske aldılar. Aynı şeyni olarnıñ anasına da yaptılar. Olar olarnı özleyler, bu qızlarnıñ kederli közlerine baqıñız. Anaları ve babaları yoq", — dep siyasiy mabüsniñ anası qayd etti.
Şimdi Remzi Nimetulayev Rusiyeniñ Rostov-na-Donu SİZOsında qanunsız sürette tutula. O, uydurılğan dava boyunca "mahkeme"ni bekley. Esma işğalciler tarafından Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) SİZOsında tutula, çağına yetmegen beş qızı ise Esmanıñ ağası tarafından baqıla.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
