Saban ayınıñ 23-nde gece işğal etilgen Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad ) şeeriniñ Korçagin soqağındaki mesken evde patlav olğan soñ bölge fevqulâde vaziyeti rejimi ilân etildi.
Mütenasip "qarar"nı işğalli şeer gubernatorı Mihail Razvojayev imzaladı, dep sabannıñ 24-nde RİA "Novosti" Rusiye haber agentligi bildirdi.
"Sevastopol şeeri, Gagarin belediye bölgesi, P. Korçagin soqağı, 14-nci ev, Sevastopol şeeri, Gagarin belediye bölgesi, P. Korçagin soqağı, 16-ncı ev, Gagarin belediye bölgesi, P. Korçagin soqağı, 20-nci ev adresindeki vaziyetni bölge fevqulâde vaziyeti olaraq tanımaq", — dep beyanatta qayd etildi.
Bu rejim sabannıñ 24-nden başlap ve "qarar"da qayd etilgen ayrı emirlerge qadar çalışacaq.
Hatırlatamız ki, sabannıñ 23-nde aqşam işğal etilgen Sevastopol (Aqyar) şeeriniñ Korçagin soqağı, 14 adresi boyunca mesken ev patladı. Neticesinde daire divarı ve qatlar arasındaki örtük qısmen yıqıldı. Qomşu 20-nci evde patlav dalğası sebebinden yanğın çıqtı, onı toqtatıp oldılar.
Sakinler tahliye etildi. "Gubernator" Mihail Razvojayevniñ aytqanına köre, eki adam elâk oldı, eñ az sekiz adam yaralandı. Şaatlarnıñ bildirgenine köre, patlav bir qaç kilometrge qadar eşitildi, eñ az 15 daire zarar kördi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
