Saban ayınıñ 23-nde aqşam vaqtınca işğal etilgen Sevastopolnıñ (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adnıñ) mesken evlerinden birinde patlav yüz berdi, onıñ neticesinde bina yıqıldı ve qomşu evde yanğın çıqtı.
Vaqia aqqında Rusiye kontrolindeki şeer "gubernatorı" Mihail Razvojayev bildirdi.
Patlav Korçagina soqağı, 14 adresi boyunca bir evde yüz berdi. Neticesinde birinci qattaki dairelerniñ biriniñ divarı qısmen yıqıldı, em de birinci ve üçünci qatlar arasındaki içki örtükler zarar kördi.
Qomşu 20-nci evde patlav dalğası neticesinde eki kirişniñ daireleri yandı. Yanğınnı toqtatıp oldılar, qurtarıcılar zarar körgen yerlerni yoq etmege devam eteler.
Eki evniñ de sakinleri tahliye etildi. Olar içün eñ yaqın mektepte muvaqqat yerleşüv noqtası açıldı, evleri yaşamaq içün yaramay olğanlarnı ise pansionatta yerleştirmege planlaştıralar.
İşğalli akimiyetniñ malümatına köre, patlav neticesinde eki insan elâk oldı. Eñ az sekiz kişi yaralandı ve hastahanege alındı.
Aynı vaqıtta Rusiye kontrolindeki Rusiye Tahqiqat eyyetiniñ Qırım ve Sevastopol (Aqyar) şeerindeki idaresi insanlarnıñ ölümi sebebinden cinaiy dava açılğanını bildirdi. Dava, tedbirsizlik sebebinden ölümge yol berüv maddesine istinaden açıldı.
Tahqiqatnıñ malümatına köre, patlav birinci qattaki dairelerden birinde yüz berdi, soñra binanıñ qurulışları viran etildi. Daireniñ saibi elâk oldı, onıñ 2006 senesi doğğan oğlu ise habersiz ğayıp olğan sayıla.
Qırımdaki fevqulâde vaziyetler nazirliginiñ malümatına köre, adise yerinde fevqulâde vaziyetler hızmeti çalışa. Tahminen 198 insan ve 55 dane tehnika zarar körgen yerlerni temizlemege yardım etti.
"Qırım yeli" Telegram kanalı, şaatlarğa atıf etip, patlav sesi 4-5 kilometr mesafede eşitilgenini bildirdi. Olarnıñ malümatına köre, eñ az 15 daire zarar kördi, sekiz balkon ise bütünley yandı.
Berilgen malümatqa köre, patlav dalğası bir qaç daireniñ divarlarını yıqtı, patlav merkezi ise binanıñ üst qatlarında ola bile edi. Vaqia sebepleri ve şaraiti şimdilik ögrenilmekte.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
