Saban ayınıñ 19-na keçer gecesi, Ukrayina mudafaa quvetleri Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) Fiolent şossesi rayonında "Almaz-Antey" kontserniniñ obyektlerine ücüm etti. USQniñ Baş ştabınıñ malümatına köre, "Granit" istisal-tehnikiy müessisesiniñ zarar körgen innovatsiya merkezinde Rusiye ava mudafaası sistemaları tamir ve hızmet etile.
Baş ştab Facebookta bunı bildirdi.
"Ayrıca, kontsern vaqtınca işğal etilgen Ukrayina Qırımınıñ "ava mudafaası" temelini teşkil etken tehnikanı baqa. Bundan ğayrı, onıñ obyektlerinde S-400 "Triumf", S-300PM2 "Favorit" zenit raketa sistemaları, 92N6E ve 96L6E radiolokatsiya stantsiyaları, orta ve qısqa mesafeli "Buk-M2/M3" ve "Tor-M2" zenit raketa sistemaları tamir etile", — dep Baş ştab añlattı.
Bundan ğayrı, Sevastopolda (Aqyarda) Striletska körfezi rayonında Rusiye ordusınıñ hadimleriniñ toplaşuv yerleri zarar kördi, işğalcilerniñ ğayıpları ise belgilene, dep Baş ştab qoştı.
Saban ayınıñ 19-nda gece Qırımda yüz bergen vaqialar aqqında video Facebookta USQniñ arbiy-deñiz quvetleriniñ saifesinde derc etildi.
Hatırlatamız ki, saban ayınıñ 19-na keçer gecesi İşğalli Sevastopol (Aqyar) gubernatorı Mihail Razvojayev ise, dron ücümi ve şeer toprağına viraneler tüşkeni aqqında bildirdi. Striletska körfezi rayonında urulıp tüşürilgen UUAleriniñ viranelerinden bir yerde ot yanıp başladı, Fiolent şossesi rayonında urulğan UUAniñ viraneleri sebebinden ise ot ve sanayı binalarından biri yandı. "Qırım yeli" resursınıñ malümatına köre, Razvojayevniñ aytqanı sanayı müessisesi AMSnıñ tamirlevinen oğraşa.
Bundan ğayrı, RF Mudafaa nazirligi işğal etilgen Qırım üzerinde gece 35 uçucısız uçaq aleti tüşürilgenini bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
