İşğalli Qırım mahkemesi Sudaq sakini "aşırıcılıqqa açıq çağıruvlar" içün müstemlekede 2 yılğa üküm etti. O, içtimaiy ağlarda "milliy bir gruppağa qarşı zorbalıq areketlerine çağıra" dep yazılğan fotoresimlerni derc etti.
Saban ayınıñ 12-nde işğalli Qırım prokurorlığı Telegramda bunı bildirdi.
Bundan da ğayrı, adamğa eki yıl devamında elektron ve haber-telekommunikatsiya ağlarınıñ saytlarını, şu cümleden İnternetni idare etmek yasaq etildi.
"Qayd etilgenine köre, mabüs, mahsus arbiy operatsiyanıñ (Rusiye akimiyeti Rusiye Federatsiyasınıñ Ukrayinağa qarşı cenkini böyle adlandıra — muarrir) keçirilmesine qarşı olıp, 2024 senesi kiçik ayda içtimaiy ağlardan birinde milliy mensüpligine köre ayırılğan şahıslar gruppasına qarşı zorbalıq areketlerine çağırağan fotoresimlerni yerleştirdi", — dep haberde aytıla.
Bundan da ğayrı, Qırım sakiniden "devlet faydasına" telefonı ve komputeri alındı.
Rusiye vaqtınca işğal etilgen Ukrayina topraqlarında halqara uquqnı muntazam sürette boza, cenkni tenqit etkeni ve uydurılğan qabaatlavlar sebebinden vatandaşlarnı kütleviy sürette tutıp ala. BMTnıñ insan aqları boyunca nezaret missiyasınıñ yolbaşçısınıñ muavini Noel Kalgun qayd etkenine köre, böyle tevqifler vaqtında işğalciler ukrayin ve halqara qanunları yerine Rusiye qanunlarını qullana.
Bundan da ğayrı, Rusiyede cenkke qarşı laflarnen bağlı sımarışlar ep arta, ve bu ameliyatnıñ esas meydanı işğal etilgen Qırım oldı. Yalıñız küzniñ başında yarımadada "arbiyni itibardan tüşürgen" içün 1500 protokol tizildi. Bu aqta Ukraina tışqı istihbarat hızmeti bildire.
Olarnıñ malümatına köre, 2022 senesi kiçik aydan 2025 senesi ilk qış ayına qadar Rusiye mahkemeleri 12 019 memuriy ve 227 cinaiy davanı baqıp çıqtı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
