Rusiyede, bu añlamnıñ uquq ceetinden tam bir tarifi olmağanına baqmadan, çaqmaq dalğası arta. Bu ameliyat, içtimaiy ağlarda cenkke qarşı ifadelerni tapmaq ve taqip etmek içün esas meydanğa çevirilgen vaqtınca işğal etilgen Qırımda hususan büyük oldı.
Ukrayina Tış istihbarat hızmeti bunı bildirdi.
Hızmetniñ bildirgenine köre, Qırımda gece-kündüz içtimaiy platformalarnı nezaret etip, uquq qoruyıcı müessiselerge kritik ya da cenkke qarşı yazılar aqqında malümat bergen insanlar gruppaları çalışa. Küzniñ başında anda "Rusiye Federatsiyası ordusını itibardan tüşürüv" maddeleri boyunca 1500 protokol tizildi. Diger lider bölgeler arasında Moskva, Sankt-Peterburg ve Krasnodar ülkesi.
Hızmetniñ malümatına köre, "muqayt olmağanlar"nıñ maqsatları çeşit ola: sahte vatanperverlik şiarlarından başlap, maddiy menfaat ya da iş yükselüvine qadar. Bu dalğanıñ timsali uzun müddet Anna Korobkova uydurılğan adı altında areket etken Yekaterinburg sakini İvan Abaturov oldı. O, ocalar ve alimlerge qarşı yüzlernen şikâyet yolladı.
"Rusiye Federatsiyasınıñ repressiv sisteması bu kibi "signallar"nı davalarğa çevire. 2022 senesi kiçik aydan 2025 senesi ilk qış ayına qadar mahkemeler 12019 memuriy ve 227 cinaiy davanı "ordunı itibardan tüşürüv" sebebinden baqtı. Mevzu açıq-aydın körüne: memuriy davalar yavaş-yavaş cinaiy davalarğa deñişe. Kreml, bu çaqmaq müitine tek tolerantlıq köstermey, o, onı teşviq ete", — dep UTİH qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
