Qartanası Sumı vilâyetinde doğğan Avstraliyalı çelikçi Keysi Gadaleta, Rusiyeniñ istilâsınıñ başında Buçada elâk olğan vatandaşlarnıñ videolarını körgen soñ, Ukrayina Silâlı quvetlerinde hızmet etmege qarar berdi. 15 biñ kilometrlik yol keçken soñ cebege bardı, ağır uruşlar, yaralanmalar ve uzun reabilitatsiyadan keçti.
Bir ayağını coyğan adamğa protez qoyuldı. O, Suspilne Qırımğa cebege qaytmağa azır olğanını bildirdi, çünki soñuna qadar küreşmege vade etti.
"Men eñ çoq dört kişiden ibaret bir qorantanı hatırlayım. Dıvar yanından ana, yanında eki oğlu. Em de dört ya da beş yaşındaki küçük bir qızçığı. Onıñ elleri ve ayaqları, boynunda bir ipliknen bağlanğan, çıplaq edi. İşte o vaqıt soñki qarar aldım: Ukraiynağa ketem", — dep Gadaleta hatırladı.
Keysi, 80-nci desant-ücüm brigadasında çalışqan istihbarat gruppasınen beraber, 2024 senesi USQniñ Sucağa ücümi esnasında Kursk vilâyetinde vazifelerini eda ete edi.
"Rusiye toprağınıñ 2,5 kilometrlik açıq meydanını keçmek kerek edi — bu arabada... İstihbaratnıñ müim qısmı — duşman toprağına kirip, onıñ er şey nasıl qurulğanını ve yerleşken yerlerini körmektir", — dep o bildirdi.
Bundan soñ — adamnıñ ilk hatırlavı böyle edi:
"Yalñız bir ateş alınğanını hatırlayım — böyle qave rengi-portaqal ateş edi. Ve men tüştiö. Başta iç bir şey duymadım".
Bir qaç saniye keçken soñ asker añladı: o, minağa ayaq bastı, ayağı yaralandı.
"Men turniketni taqmağa tırıştım, amma zırhım onı yahşıca taqmağa imkân bermey edi. Men telâşlana ve biraz qorqa edim", — dep avstraliyalı göñülli hatırladı.
O gece gruppa ateş altında, suvuqta, tahliye imkânı olmağan yerde keçirdi. Keysi dedi ki, tek ayağını degil, elini de coyacağından qorqqan edi. Qan coyğanı sebebinden ekimler birden ameliyat etip olamadılar, çünki köstergiçleri pek alçaq edi.
"Doğrusını aytsam, qol-ayağımnı coymaqtan ölsem daa yahşı olur edi. Bunıñ içün telükege oğrayıp, qolundan sarğını çıqardım. Amma o qadar çoq qan coydım ki, üç aftadan soñ bile gemoglobinniñ seviyesi pek alçaq edi. Ekimler böyle alda ameliyat etmek telükeli olğanını ayttılar. Men ölecek edim", — dep o tarif etti.
Bir qaç aylıq tedaviylenüvden soñ Keysige protez qoyuldı. Ve şimdi kene de cebege qaytmaq aqqında ayta.
"Men bu memleket ve iş içün borclu oldım. Hususan, körgenlerimden soñ, hususan, vatandaşlarğa yapılğanlardan soñ. Bu sebepten men soñuna qadar ketecegim: küçüm bar olğanına qadar, fizikiy ceetten imkânım olğanına qadar küreşmege devam etecegim", — dep arbiy hızmetçi qayd etti.
Onıñ aytqanına köre, cenkten evel Ukrayina onıñ içün yabancı degil edi. Sumı vilâyetinden ukrayinalı İnna adlı qartanası onı balalıqtan ögretken edi. 1958 senesi o, Sovetler Birliginden ticaret gemisinde qaçtı. Birinciden Büyük Britaniyağa, soñ Avstraliyağa ketti.
"O sovet devirinde yaşay edi ve er vaqıt Ukrayinanıñ pek güzel bir memleket olğanını ayta edi. Ve mında Avstraliyadan daa suvuq olğanını", — dep Keysi hatırladı.
Şimdi Gadaleta Ukrayinanı tek aile ikâyelerinden tanımay. Eñ çoq onı ukrayin arbiy hızmetçileri ayrette qaldıralar.
"Men beraber hızmet etken ukrayin arbiy hızmetçileri er vaqıt pek cesür ediler. Olar da qorantalarını pek ürmet eteler ve pek yahşı askerler olalar", — dep o ayttı.
Şimdi avstraliyalı Keysi öz kelecegini Ukrayinada köre.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
