Uquq qorçalayıcılar, Qırımda işğalli akimiyet Noman Çelebicihan adına batalyonda iştirak etkeninde qabaatlap, altı yılğa mahküm etilgen qırımtatar faalcisi Mecit Ablâmitovnıñ taqip etilmesinde qabaatlanğan beş kişini qayd ettiler.
Qırım uquq qorçalayıcı gruppası (QUQG) bunı bildirdi.
Mütenasip malümatlar QUQGnıñ onlayn resursı olğan "Qırım davaları" bazasında bar, anda siyasiy sebeplerden uydurılğan cinaiy "Qırım davaları" boyunca apishanelerde tutulğan Ukrayina vatandaşları aqqında malümat bar.
Uquq qorçalayıcılarnıñ qayd etkenlerine köre, bu resurs işğalli sistemanıñ temsilcilerini — Qırımdaki insanlarnıñ taqip etilmesinde iştirak etken mahkemeciler, prokurorlar ve Rusiye FSBsiniñ hadimlerini — körmege imkân bere.
Mecit Ablâmitov aqqında ne bilemiz
2020 senesi arman ayınıñ 19-nda FSB hadimleri qırımtatar faalcisi Mecit Ablâmitovnı tuttılar. O, 2016 senesi Rusiye Ceza qanunnamesiniñ 208-inci maddesiniñ 2-nci qısmına istinaden "Noman Çelebicihan adına qırımtatar batalyonında iştirak etkeni"nde qabaatlandı.
2020 senesi arman ayınıñ 20-nde Simferopolnıñ (Aqmescitniñ) "Kıyiv rayon mahkemesi" oña tevqif şeklinde tedbir aldı, soñra ise onı defalarca uzattılar. Advokat Ayder Azamatovnıñ aytqanına köre, Ablâmitov, evi tintilgen soñ, ruhiy basqı altında şaatlıq etti. Mahkeme oturışında "gizli şaatlar" da bar edi, qorçalayıcı taraf aytqanı kibi, bazı şaatlar sahte ola bile edi.
2021 senesi saban ayınıñ 23-nde Qırım "Kirov rayon mahkemesi" Mecit Ablâmitovnı sert rejimli müstemlekede 6 yılğa üküm etti. 2021 senesi ilk küz ayında Rusiye Federatsiyasınıñ Astrahan vilâyetindeki 6-nci müstemlekesinde onı "terror faaliyetine meyilli şahıslar" cedveline kirsettiler.
Noman Çelebicihan adına batalyon — 2016 senesiniñ başında işğal etilgen Qırımnen memuriy sıñırnıñ qamaçavı vaqtında teşkil etilgen qırımtatar birleşmesidir. Rusiyeniñ Ukrayinağa yolu miqyaslı istilâsından soñ Silâlı quvetler erkânında aynı adı olğan göñülli arbiy bölük peyda oldı.
2022 senesi Rusiye Yuqarı mahkemesi batalyonnı terroristik teşkilât olaraq tanıdı. Amma Rusiye, tolu miqyaslı istilâdan evel olğan cemaat teşkilâtınıñ iştirakçilerini taqip ete.
