Daa evel yerli sakinler Feodosiya (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeerindeki Gavriil ve Mihail arhangeller ibadethanesiniñ çañ qullesiniñ viran etilgenine diqqat ettiler. O zaman işğalli mebuslar, restavratsiya içün para ayırmağa söz berdiler. Qırımtatar resurs merkezi (QRM) qayd etti ki, bu, işğalli memuriyetniñ uyğunsız qayğıruvı ve muntazam areketsizliginiñ neticesi oldı.
QRM, işğalcilerniñ Qırımdaki medeniyet mirasınıñ saqlanmasına dair areketsizligi aqqında yazdı.
"Vaqtınca işğal etilgen Qırım toprağındaki tarihiy ve diniy abidelerniñ viran etilmesi — işğalli memuriyetniñ uyğunsız qayğıruvı ve muntazam areketsizliginiñ neticesidir. Böyle adiseler, olarnıñ yarımadadaki medeniyet mirasınıñ saqlanmasına dair areketsizligini qayd ete ve Qırımnıñ çoq milliy tarihınıñ yekâne obyektleriniñ yoq etilmesine yol aça'', — dep QRM qayd etti.
Gavriil ve Mihail arhangeller ibadethanesi — 1408 senesi qurulğan ermeni cemaatınıñ katolik kilsesidir. Bina, roman üslübi elementlerinen beraber orta asırlardaki ermeni mimarcılığınıñ ananeviy üslübinde qurulğan. İbadethane kireç irintisinen yapıştırılğan yerli but taşlarınen qurulğan, mağazları ve köşeleri ise yonulğan taşlarnen qurulğan. Bina, medeniy miras obyektleri cedveline kirsetilgendir. 1968 senesi soñ kere restavratsiya etildi.
2026 senesi qara qış ayında yerli sakinler çañ qullesindeki peyda olğan çatlaqlar aqqında haber berdiler. O zaman işğalli aklimiyet eyyet teşkil etecegini bildirdi ve para olsa, ''restavratsiya işlerini planlaştırmaq'' niyetini qayd etti.
Faqat birazdan çañ qullesi tamamınen yıqıldı. Bundan ğayrı, ibadethaneniñ divarlarında çatlaqlar daa büyükm oldı.
Gavriil ve Mihail arhangeller ibadethanesinde kütleviy dualar oqunmaz. Turistler içün de qapalı. Buña baqmadan, ''Krım 24'' rusiye telekanalınıñ malümatına köre, yasaqlarğa baqmadan ibadethane toprağında maşnalarnı park eteler.
Evel Suspilne Qırım yazdı ki, işğal etilgen Qırımnıñ Feodosiya (Kefe) şeerinde topraq suvları basqanı içün XIV asırda qurulğan Surb Sarkis ermeni ibadethanesi viran etüv telükesine oğradı. Anda ressam-marinist İvan Ayvazov kömülgen.
Bundan ğayrı, Feodosiya (Kefe) şeerinde orta asırlarda qurulğan aziz Kostântın qullesi yıqıla. Qulleniñ yıqılması yağmur yağğan soñ daa beter ola.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
