Saban ayınıñ 2-nde Kıyiv mahkemesi, tahqiqat malümatına köre, 2014 senesi yarımadanıñ tasil müessiselerinde Rusiye standartlarına köre oquv esnasını teşkil etken Yalta mektebiniñ sabıq müdiri içün tahqiqat tedbirini 60 künge — 2026 senesi çeçek ayınıñ 30-na qadar uzatmaq muracaatını qanaatlendirdi. Bundan evel uquq qorçalayıcılar oña duşmannen işbirlik yapqanından şübe bildirdiler. Qadın Kıyiv vilâyetinde, soy-soplarınıñ evinde bulunğanda tutuldı.
Mahkeme salonından Suspilne Qırım mühbiri bunı bildirdi.
Mahkeme oturışı vaqtında şübelengen qadınnıñ adliyecisi tevqif tedbirini deñiştirmege teklif etti, şu cümleden, onı kefaletnen azat etmege ve ev apsinde tutmağa teklif etti, amma, prokurornıñ aytqanına köre, sabıq Qırım müdiriniñ Ukrayinanıñ kontrol etkeni topraqta qayd etilgen yaşağan yeri yoq.
Bundan evel oña Ukrayina Ceza qanunnamesiniñ 111-1 maddesiniñ 3-ünci qısmına istinaden (duşmannen işdeşlik faaliyet) şübe bildirdiler. O vaqıt Qırım Muhtar Cumhuriyeti prokurorlığınıñ muracaatına binaen, mahkeme eki ayğa kefaletsiz tevqif tedbirini sayladı. O, üç yılğa qadar apis cezasına üküm etile bile.
"Açıq telüke şunda ki, o, cinayet davalarında olğan vesiqalarnı yoq ete ya da boza ve şaatlarğa basqı yapa bile. Dava boyunca sorğuğa çekilgen eki şaat bar. Olardan biri — onıñ soy-sopı, başqası — 2014 senesine qadar Turlakova ile çalıştı. Bütün bu telükelerni köz ögüne alıp, şübelengen qadın daa 60 künge apis müddetini uzatmağa rica etem", — dep prokuror mahkemede bildirdi.
1962 senesi doğğan Turlakova Svitlana 2026 senesi qara qış ayınıñ 7-nde Kıyiv vilâyetinde ukrayin uquq qoruyıcıları tarafından tutuldı. Mahkeme oturışında qabaatlanğannıñ advokatınıñ aytqanı kibi, oğlu Ukrayinanıñ paytahtında yaşay ve uquq qorçalayıcı organlarında çalışa. Onıñ adresini imayeci, ev apsinde bulunmaq içün berdi. ruslar ise onı işğal etilgen Yaltadaki mektepten boşattılar.
"Dava malümatına köre, o, 2014 senesi Ukrayina yarımadası işğal etilgen soñ duşmannen işbirlikke kirdi. O vaqıt qadın Yaltadaki umumtasil tasil müessiselerinden biriniñ müdiri edi ve işğalcilerge destek kösterdi. Bunıñ içün oña yerli mektepni idare etmege, tasil esnasını Kremlniñ "standartları"na köre "deñiştirmege" avale ettiler", — dep Ukrayina havfsızlıq hızmeti bildirdi.
QMC prokurorlığınıñ malümatına köre, 2025 senesi ilk qış ayınıñ soñunda şübelengen qadın Ukrayinanıñ kontrol etkeni topraqqa keldi, mında onı tapıp, Kıyivde kirağa alğan dairede tuttılar. Tintüv vaqtında Rusiye pasportları ve işğalciler ile işbirlikni isbatlağan tehnikanı tutıp aldılar.
Bu dava boyunca kelecek mahkeme oturışı saban ayınıñ 13-ne planlaştırıldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
