"Sevastopol" lağabınen Qırım askeri İğor Movenko 20 yıldan ziyade tuvğan şeerinde dj olaraq çalıştı, anda da ömür arqadaşı Valentına ile tanış oldı. Ukrayin timsalleri ve işğalge qarşı izaatları sebebinden ruslar tarafından taqip etilgen soñ, o şartlı apis cezasını aldı ve apayınen beraber Sevastopoldan (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki addan) Kıyivge köçti. Rusiye istilâsı başlağanından berli USQde hızmet ete, ava istihbaratınen oğraşa.
İgor Movenko Suspilne Qırımğa işğal etilgen Sevastopolda (Aqyarda) yaşağan yılları, Ukrayina tarafdarı olğanı içün taqip etilgeni ve orduda hızmet etkeni aqqında tarif etti.
Movenko mektep bitirgeni ve ordudan çıqqan soñ, 90-ıncı yıllarnıñ soñunda, dj oldı ve 20 yıldan ziyade Qırım cıyınlarında çala edi.
"Men kasetler djniñ esas aletleri olğan devirnde yaşadım. Ve yavaş-yavaş, 2000 senesinden başlap, er şey disklerni qullanmağa aşladı", — dep o ayttı.
2000 senesi bir cıyındaa İğor kelecek ömür arqadaşı Valentına ile tanış oldı.
"Menim iş künüm tam olaraq saat 18:00-de başlap, belki sabağa qadar devam ete edi. Bu, qızlarnen tanış olmaq içün yekâne yer ve vaqıt edi. Valüşa ile böyle tanış oldıq. Bu himiya kibi bir şey. Bu birinci körüşüvden olğan sevgi degilmi?" — dep o hatırladı.
Çift eki şeerde yaşağan edi — Kerç ve Sevastopolda (Aqyarda). Bir qıznı da baqıp yetiştire ediler.
"Men Sevastopolnı atmosferası içün sevem. O yerge köçkende, pek samimiy bir yer kibi köründi. Bu, er kesniñ kelgeni bir şeerdir. Soñra belli oldı ki, anda insanlar bozuldı. Sevastopol, Sovetler Birliginiñ teşviqatı kibi. Böyle küçük bir saqlanğan Sovetler Birligi Ukrayinanıñ merkezinde edi", — dep Movenko añlattı.
İğor 2014 senesiniñ başında Sevastopolnı (Aqyarnı) hatırlay: o vaqıt şeerde ecnebiylerniñ çoq olğanını kördim.
"Olarnı bir vaqıtları büyük miqdarda ketirdiler. Olarnı yerli sakinler kibi köstere ediler, ve olar anda Rusiye bayraqlarınen tura ediler. Yani bu pek açıq edi ve körüne edi ki, anda — tek erkekler, anda — balalar, qartlar ve qadınlar. Yani, cemiyetniñ bütün qısımları ukrayin tarafdarları meydanlarında toplanğanını körmek mümkün, Rusiye tarafdarları ise — tek nasıldır añlaşılmaz adamlar edi", — dep Sevastopol sakini tarif etti.
İğor özü Ukrayinağa qoltutqan aktsiyalarğa çıqıp, vatanperver timsallerini taqqan edi.
"Men ukrayin olğanımnı kösterdim. Çünki o vaqıt qıtaiy Ukrayinada insanlar Qırım sakinlerine menfiy yanaşa ediler, Qırımda hainler bar, ukrayinler yoq, dep tüşüne ediler. Ve ukrayinler bar olğanını köstermege istedim. Tabiiy ki, çatışmalar oldı, lâkin bundan ğayrı. Ve bunıñ episi özüñiz bilesiñiz nege ketirdi", — dep Qırım sakini hatırladı.
2016 senesi adam ayaqmaşnasında Ukrayina tuğrası ve "Azov" timsallerini taşığanı içün köteklendi.
"Olar endi meni qıdıra ediler. Soñra bir vaqıtları maña ücüm ettiler. Başta memuriy, soñra cinaiy [dava]. Memuriy dava — "Azov" timsalleri içün, çünki olar bunı aşırıcı timsaller dep saya ediler. Ve cinaiy dava ise içtimaiy ağda aşırıcı olaraq tanılğan bir izaat sebebinden açıldı, çünki men işğalge qarşı sert bir şekilde çıqışta bulundım", — dep Movenko bildirdi.
Rusiyeliler İğornı 2 yılğa apiske aldılar. Apellâtsiya vaqtında imayecisi şartlı apis müddetini aldı. 2019 senesinde bitirilgen soñ qorantası yarımadadan Kıyivge köçti.
"Bizge yaşamağa ve çalışmağa bermeycekler. Ya da akimiyetine sadıqsıñ, ve o zaman yaşay bilesiñ... Men içün Kıyivge köçüv daa qolay degil edi — maneviy ya da başqa bir şey. Ahlâqiy ceetten qolay edi. Şartlı sıñırnı keçtiñiz, ve başqaca is etesiñiz, sanki ava başqaca", — dep o ayttı.
İğor Movenkonıñ Rusiye istilâsına qarşılıq 12 yıldan berli devam ete. RFnıñ Ukrayinağa istilâsınıñ birinci künlerinden başlap, o, Ukrayina Silâlı quvetlerinde hızmet ete.
"Ketip-ketmeycegim kibi bir saylavım yoq edi. Bunı yapmaq kerekim. Er kes ketmek kerek edi. Men endi 23-nci kün- askerlik komissarlığında edim. Er şey menim içün er şey kiçik aynıñ 23-nde başladı. Bizni askerlik komissarlığında qoruv bölügine ala ediler", — dep asker ayttı.
Başta o Kıyivni qorçaladı, soñra ise farqlı "sıcaq noqtalar"daki uruşlarda iştirak etti.
"Men 30-ıncı brigadağa qoşuldım. Harkiv ücüminde iştirak etti. Nevbetteki brigada — Bahmut, üç ay. Soñra, bir aydan soñ, üç ayğa Bahmutqa da kettim. Mıkolayiv vilâyetinde qısqa bir müddetke de kettiler. Soñra Zaporijjâğa qarşı ücüm — anda da iştirak ettim. Soñra Pokrovsk yönelişinde eki brigada edi — anda da üçer ay keçirdim", — dep Movenko bildirdi.
Şimdiki vaqıtta adam 78-ci desant-ücüm brigadasında hızmet ete, Sumı vilâyetinde "Leleka" ukrayin dronı vastasınen ava keşifini yapa.
Kiçik ayda rusiyeliler Movenkoğa qarşı daa bir cinaiy dava açtılar. "Devlet hainligi"nde qabaatlaylar.
"Ukrayinağa hainlik yapqanlar — FSB hadimi olğan sabıq UHH hadimleridir. Meni Rusiyege hainlik yapqanımda qabaatlaylar. Menim içün bu şok, isterik, açuv, çünki bu komiktir. Yani meni devlet hainliginde qabaatlaylarmı? Menimi? Ukrayinalınımı? Ukrayina vatandaşınımı? Bunı nasıl izaatlaycağımnı bilmeyim", — dep Qırım sakini qayd etti.
Cenkte bile şimdi kiçik serjant, keçmişte ise dj İğor Movenko muzıka yaza. Onıñ aytqanına köre, şimdi buña vaqıt yoq, amma hızmetten çıqqan soñ onı diñleyicilerge taqdim etmege istey.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
