Bu afta işğal etilgen Qırımda Rusiye kontrolindeki mütehassıslar eki şeer — Krasnoperekopsk ve Aqmescitte (SimferopoldaRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) ava kirlenüvini qayd ettiler. İşğal etilgen Yalta, Keriç, Ermeni Bazarı ve Aqyarda (Sevastopolda) keçirilgen tedqiqler bir de bir deñişüv tapmadı.
Kiçik aynıñ 22-nde "Kafanews" işğalci neşiri "Qırımgidromettsentr"ge atfı etip bildire.
"Yanı Kapu (Krasnoperekopsk) — atmosferik ava kirliligi, HCl (II seviye). Aqmescit (Simferopol) — atmosfera avasındaki ağır maddeler ile kirlilik (seviye 1). Yalta, Keriç, Ermeni Bazarı ve Aqyarda (Sevastopolda) ava kirliligi qayd etilmedi. Diger şeerlerde ava kirliligi ögrenilmey", — dep haberde aytıla.
2-nci dereceli (keçici derecede) suv hloridli gaz (HCl) ile kirlenüv, bu toksik maddeniñ kontsentratsiyası sıñırdan ziyade olğanını ve ealiniñ hassas gruppaları içün telüke doğurğanını ifade ete. Bu nefes yolları, közler ve boğazda, hususan astma ya da allergiyası olğanlarda, qızdırıcı ola bile.
Atmosfera avasındaki ağır maddelernen (çoqusı alda toz ya da aerosol olaraq adlandırıla) kirlenüv, ava keyfiyetiniñ eñ kritik köstergiçlerinden biridir, çünki bu mikroskopik parçacıqlar insan sağlığına tesir ete.
Qırımdaki ava kirlenmesiniñ sebepleri aqqında işğalci kütleviy haber vastaları ve "akimiyet organları" haber etmey edi.
Hatırlatamız, 2025 senesiniñ soñunda — 2026 senesiniñ başında işğal etilgen Qırımda Keriç sakinleri asfalt zavodınıñ işine muntazam surette şikâyet ete ediler, zavoddan avağa kirli himiyeviy duman çıqa edi. Olarnıñ aytqanına köre, soqaqta bulunmaq sağlıq içün telükeli ola. Semptomları arasında — baş ağrısı, bulantı ve aylanuv.
"İnsanlar soqaqlarda nefes almağa qıyın olğanını aytalar, büyükler ve balalarda baş ağrıları, bulantı ve aylanuv peyda ola. "Sarı şerit" areketiniñ faalleri bildirgenine köre, mesele bir ya da eki ay devam etmey. Şikâyetler muntazam sürette berile, amma neticesi yoq", — dep "Sarı şerit" areketiniñ beyanatında aytıla.
2025 senesi ekim ayınıñ başında qırımlılar işğal uquq qoruyıcılarına Keriç rayonınıñ Şçolkin şeerindeki işhanege şikâyet etti. Tibbiy çöplükniñ qullanuvı şeerde himiyalarnıñ keskin kokusını taşıy.
Bundan da ğayrı, Aktaskoye gölü yanında yerleşken zavod, gaz temizlevden çıqqan atıqlarnı yanındaki topraqqa yerleştire, bu ise topraqnı, yerastı suvlarnı kirlete. O, Akta gölü, Azaq deñizi ve Kazantip qoruğı içün telükeli ola bile. İşğalciler ekinci kere bu işhanege qarşı tabiat qoruv qanunlarınıñ bozuluvı sebebinden cinaiy iş açtılar.
Bundan evel "Sarı şerit" areketiniñ bildirgenine köre, işğal etilgen Qırımda Keriçte suv keyfiyetinden şikâyet eteler: kranlardan yaramay koknen sarı suv aqa. İşğalciler, suv içile bile, dep ayta.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
