Qırımda siyasiy taqipler devam ete. Bu afta devamında işğalci quvetçiler yañı "devlet hainligi" ve "casuslıq" davaları aqqında bildirdi, Qırımnıñ siyasiy mabüslerine ükümler çıqardı, mabüslerni qanunsız şekilde Rusiyege yolladı ve diniy cemiyetlerge qarşı basqı devam etti. Suspilne Qırım qırımlılarğa qarşı yapılğan basqılar aqqında faktlarnı topladı.
"Devlet hainligi" ve "casuslıq": Qırımda işğalciler çiftni qanunsız sürette mahkeme etmege isteyler
İşğalli quvetçiler Qırımlı çiftni "Ukrayina havfsızlıq hızmetinde çalışqanı"nda qabaatladılar. Rusiye vatandaşı olğan adamnı "devlet hainligi" içün, onıñ ömür arqadaşı olğan Ukrayina vatandaşını ise "casuslıq" içün qanunsız sürette mahkeme etecekler.
"Qabaatlanğan, "SVO"nıñ keçirilmesine qarşı olıp, 2024 senesi Ukrayina Havfsızlıq hızmetiniñ vekilinen bağ tuttı, oña Rusiyege qarşı faaliyetinde çetel istihbaratına yardım etmege azır olğanını bildirdi. O, kuratordan Yalta sıñırlarında yerleşken silâ ve arbiy tehnika aqqında malümat bermek vazifesini aldı. Bu qanunsız areketlerge adam ömür arqadaşını celp etti", — dep haberde qayd etildi.
İşğalciler Keriçli "Yehova şaatı" Vitaliy Burıknı altı yılğa üküm ettiler — QUQG
İşğalciler, Keriçte yaşağan "Yehova şaatı" Vitaliy Burıknı "aşırıcı teşkilâtnıñ faaliyetini teşkil etüv"de qabaatlap, altı yılğa apishanege qapattılar.
"QUQGnıñ haber etkenine köre, 2024 senesi orta küz ayınıñ 9-nda saba işğalciler Keriçte "Yehova şaatları"nıñ eñ az 10 adresini tinttiler. 53 yaşındaki Vitaliy Burıknı iş yerinde, qazanhanede tuttılar. Burıkqa qarşı "aşırıcı teşkilâtnıñ faaliyetini teşkil etkeni" içün cinaiy dava açıldı. O, eki kün VTİda tutuldı, soñra ev apsine alındı", — dep haberde qayd etildi.
Qırımda sabıq siyasiy mabüs İğor Movenkoğa qarşı cinaiy dava açıldı — QRM
İşğalciler Qırımdan ukrayin arbiy hızmetçisi İğor Movenkoğa qarşı "devlet hainligi" içün yañı cinaiy dava açtılar. Rusiye onı "aşırıcılıq"ta qabaatlap, taqip ete edi.
İğor Movenkonıñ QRMe bildirgenine köre, onı "devlet hainligi" ve "Ukrayina Silâlı quvetleri terkibinde RFa qarşı arbiy areketlerde iştirak etüv"de qabaatlaylar.
O, işğalli qurulışlarnıñ böyle areketlerini saçmalıq dep adlandırdı, Ukrayina vatandaşı olğanını ve bu sebepten "Rusiyege hainlik" qabaatlavı uquqiy ceetten boş ve siyasiy sebepli olğanını qayd etti.
İşğalcilerniñ Qırım kirişinde hırsızlanğan Ancelika Demyanenkonı qayda qanunsız olaraq etap etkenleri belli oldı
2023 senesi Ancelika Demyanenko ve babası Oleksiy işğal etilgen Herson vilâyetinden Qırım üzerinden çıqmağa tırıştılar. Amma Çonğar kiriş noqtasında işğalciler olarnı qanunsız alda tuttılar. Bir buçuq yıl soñra, olarnı "casuslıq"ta qabaatlap, babasını 14 yılğa, qızını ise 10 yılğa mahküm etkenleri belli oldı. Şimdi Ancelikanı qanunsız olaraq Mordoviyanıñ Yavas köyündeki qadınlar müstemlekesine etap ettiler.
"Qırım kirişinde hırsızlanğan ve soñra casuslıqta qabaatlanğan Ancelika Demyanenko, Mordoviyanıñ Yavas köyündeki qadınlar müstemlekesine etap çerçivesinde keldi. Bu müstemleke, ekstremal şaraitte ağır işke mecbur etüv ve mahkümlerge nisbeten pek sert munasebetnen belli", — dep haberde qayd etildi.
"Biñ ğrıvnâlıq sadaqa": FSB Keriç sakini Kırılo Kostığovnı "devlet hainligi"nde qabaatladı
Ruslar, işğal etilgen Keriçte yaşağan Kırılo Kostığovnı qanunsız sürette apiske aldılar ve "devlet hainligi"nde qabaatlaylar. Rusiye tahqiqatınıñ malümatına köre, bunıñ sebebi "Ukrayina hayriye teşkilâtlarına para yollav" oldı, onıñ miqdarı tahminen biñ ğrıvnâ oldı. Ukrayinada onıñ anası yaşay.
"Başta Rusiye uquq qorçalayıcıları Kostığovğa qarşı memuriy apis cezalarını qullanğan ediler — onı 2025 senesi oraq-ilk küz aylarında apiske almaq içün "küçük yaramazlıq"nen uydurılğan qabaatlavlarnı ket-kete qoya ediler. Tek ilk küz ayında Rusiye akimiyeti "devlet hainligi" maddesi boyunca siyasiy sebeplerden qabaatlavnı seslendirdi. Oña 12 yıldan 20 yılğa qadar apis cezası berilecek", — dep QRM yazadı.
Qırımda qadınlar siyasiy mabüslerge mektüpler yazma aqşamını teşkil ettiler — "Qırım birdemligi"
Kiçik aynıñ 19-nda işğal etilgen Qırımda siyasiy mabüslerge mektüp yazma aqşamı olıp keçti. Qadınlar, bugün siyasiy sebeplerden azatlıqtan marum etilgenlerge qoltutuv şiarlarını yazdılar.
Bağçasaray sakinleri, hususan, siyasiy mabüslerniñ anaları ve apayları bu tedbirge qatnadılar.
"Biz olarnı muqaddes Ramazan ayınen hayırladıq. Yüce Yaratıcı olarnıñ orazalarını hafifletirsin, hayırlı işlerni qabul etsin ve adaletsizlikniñ zıncırlarından azat etsin. Biz olarnı pek bekleymiz", — dep Niyara Lümanova ayttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
