İşğal etilgen Qırım sakinleri yarımadada mobil ağ ve internetniñ sıq söndürilgeni aqqında bildireler. MMMniñ işğal altında bulunğan menbalarınıñ malümatına köre, ağ bütün Rusiye operatorlarında bir qaç saatten bir qaç künge qadar ğayıp ola.
Milliy muqavemet merkezi (MMM) bunı bildirdi.
"Sakinler mobil ve internet ağlarınıñ sıq bozulğanı aqqında bildireler. İnternet saatlerce, bazıda künlerce söndürile bile, bu ise telefon ve onlayn hızmetlerni qullanmağa imkân bermey. Bütün esas rusiye operatorlarınıñ, şu cümleden "Beeline", "MTS", "Megafon" ve "Tele2"niñ müşterileri meselelerni qayd eteler. Bunen beraber, tarif paketleri içün masraflar hızmet keyfiyetine baqmadan, tolusınen ödenile. Destek hızmetine muracaat etmek ıntıluvları sıq-sıq netice bermey", — dep MMMniñ işğal etilgen Qırımda yaşağan menbaları bildirdi.
MMMniñ malümatına köre, qullanıcılar uzun müddet beklemekten, operatorlar arasında adres deñiştirüvden ve ağnıñ ğayrıdan tiklenüv müddetine dair konkret cevaplarnıñ olmamasından şikâyet eteler. Aynı zamanda operatorlar tariflerni köterip, paketlerde İnternetniñ miqdarını eksilte. İşğal etilgen topraqlardaki ağlarnıñ stabil olmağan sebepleri aqqında resmiy izaat yoq.
2026 senesi kiçik aynıñ 17-nde Rusiye Devlet duması, FSBniñ talabınen cep telefon operatorlarını cep telefonlarını blok etmege mecbur etken qanun leyhasını ekinci ve üçünci oquvda qabul etti.
"Mediazona" neşiriniñ bildirgenine köre, vesiqanı baqıp çıqqan Rusiye mebusları FSBniñ "havfsızlıq telükelerinden qorçalamaq maqsadınen" bağ blok etilmesi aqqında "soravlar"nı "talaplar"ğa deñiştirdi, em de qanun leyhasınıñ metininden mahsus hızmetlerniñ areketleri içün resmiy sebep olaraq "havfsızlıq telükesi" aqqında söz yoq etildi.
"FSBniñ bağnı blok etüv talaplarını idare etken yekâne normativ vesiqa Putin aktları oldı", — dep "Mediazona" bildirdi.
Ukrayina prezidentiniñ Qırım Muhtar Cumhuriyetindeki daimiy temsilcisiniñ muavini Denıs Çıstikov Suspilne Qırımğa bildirdi ki, vaqtınca işğal etilgen Qırımda mobil internetniñ söndürilüvi Rusiye tarafından haber nezaretiniñ quvetleştirilmesiniñ bir elementi ola. İşğalli akimiyet böyle etip, alternativ malümatnıñ tarqaluvını sıñırlamağa, ealiniñ kerçek duyğularını gizlemege ve arbiy obyektlerge ücümlerniñ aqibetlerini qayd etmege qıyınlaştırmağa tırışa.
"Haber alanını nezaret etmege tırışqan bütün devletlerde olğanı kibi, olarnıñ da bir sesi olmalı ve başqa fikirleri olmamalı. Ve bu şekilde olar malümat alanında diger malümat ketirüvlerinden qaçınmağa tırışalar", — dep Çıstikov qayd etti.
Sıñırlavlarnıñ daa bir sebebi — işğalli akimiyetniñ ukrayin dronlarınıñ ücümlerine qarşılıq köstermek ıntıluvlarıdır. Memurnıñ aytqanına köre, cep ağları em navigatsiya, em de yarımadanıñ toprağından malümat berüv içün qullanıla.
"Vaqtınca işğal etilgen Qırımdan Ukrayina vatandaşlarından alğan malümatımız bar. Olar ücümlerniñ aqibetleri ve yolları aqqında haber ete, ve bu haberler kütleviy haber vastalarında ve içtimaiy ağlarda peyda ola. Bu sebepten işğalli akimiyet mobil internetke irişimni yasaq etmege tırışa", — dep Ukrayina prezidentiniñ Qırım MCdeki daimiy temsilcisiniñ muavini añlattı.
Bundan ğayrı, onıñ aytqanına köre, haber izolâtsiyasınıñ quvetleşüvi Rusiyeniñ 2026 senesi saylavlarğa azırlanmasınen bağlı.
Hatırlatamız ki, işğalli Qırım yolbaşçısı Sergey Aksönov bildirdi ki, işğal etilgen Qırımda internet sıñırlavları Rusiyeniñ Ukrayinağa istilâsı bitkenine qadar devam etecek.
Milliy muqavemet merkezi bildirdi ki, işğal etilgen Qırımda internetniñ söndürilüvi fevqulâde hızmetler, tibbiy müessiseler, maliyeviy hızmetlerniñ işini toqtata.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
