İşğal etilgen Qırımda internetniñ söndürilüvi fevqulâde vaziyetler hızmetleri, tibbiy müessiseler, maliye servisleriniñ işini toqtata.
Milliy muqavemet merkezi bunı bildirdi.
MMMniñ malümatına köre, işğalciler yarımadada İnternetniñ söndürilmesini basqı aleti olaraq qullanalar. Ücümler, buhran ya da halqnıñ narazılığı artqan vaqıt ağnı söndürmege ya da yavaşlatmağa planlaştıralar.
"İşğal etilgen Qırımda cep telefonı internetiniñ söndürilüvi ve suniy yavaşlatılması "vaqtınca tedbirler" olmay. Aksönovnıñ aytqanına köre, sıñırlavlar havfsızlıq sebebinden devam etecek. Esasen bu, raqamlı izolâtsiyanı qaide olaraq qabul etüv demektir. MMMniñ malümatına köre, kerçek maqsad havfsızlıq degil, nezarettir. İnternetni, vaqialarnı qayd etmek, insanlarnıñ özlerini teşkil etmek ve alternativ malümatqa irişmek imkânları sebebinden telüke olaraq köreler. Şunıñ içün söndürüv "hassas vaqıtlarda" — ücümler, buhran ya da narazılıq artqan vaqıt — qullanılacaqtır", — dep beyanatta qayd etildi.
İşğal etilgen Qırımda internet sıñırlavları Rusiyeniñ Ukrayinağa istilâsı bitkenine qadar devam etecek, dep ilk qış ayınıñ 23-nde işğalli Qırım yolbaşçısı Sergey Aksönov bildirdi.
"Bugün İnternet em yahşı, em de yaramay maqsatlarğa hızmet ete bile. "SVO"nıñ soñuna qadar bu sıñırlavlar devam etecek. Buña alışmaq kerek, başqa iş rejimine kirmek kerek. Ne vaqıt ve nasıl söndürilgenini añlamaq", — dep o ayttı.
Hatırlatamız ki, Rusiyede ve işğal etilgen topraqlarda WhatsAppnıñ çalışuv süratı 70-80%-ge eksildi. Roskomnadzor bildirdi ki, qullanıcı bütünley blok etile bile, dep RİA "Novosti Krım" yazdı.
"WhatsApp ile bağlı sıñırlavlar devam etecek. Rusiye qanunlarınıñ talapları yerine ketirilmese, messencer bütünley blok etilecek", — dep Rusiye nazirligi bildirdi.
Arman ayında yarımadanıñ işğalli "içki siyaset, malümat ve bağ nazirligi" "duşman ücümlerine qarşılıq köstermek ve Qırım vatandaşlarınıñ havfsızlığını temin etmek maqsadınen" mobil internetni uzun müddetke bütünley söndüre bilecegini bildirdi.
Raqamlı havfsızlıq mütehassısı Pavlo Belousovnıñ fikirince, sıñırlavlarnıñ kerçek maqsadı — adamlarnı Max Rusiye messencerine keçirmektir.
"Olar, YouTube ile evel olğanı kibi yapalar: başta blok etmeyler, amma "sıñırlaylar". İnsanlar yaramay bağdan bezeler ve başqa yollarnı qıdıralar. Olarğa ise er yerde çalışqan Maxnı teklif eteler. Hususan, telükesizliknen pek qasevetlengenler anda kete", — dep Belovusov Suspilne Qırımğa bergen izaatında qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
