"Hizb ut-Tahrir davası"nıñ ekinci Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) gruppasınıñ mabüsi Rustem Murasov, Rugaçov şeerindeki 4-nci Saratov tüzetüv müstemlekesine avuştırılğan soñ qızdırıcısı olmağan ceza izolâtorına (ŞİZO) yerleştirildi, çünki borularnıñ fevqulâde vaziyeti sebebinden suv borulardan töküldi. Qırımtatar faalcisi anda üç aftadan berli buluna. Onıñ sağlığı fenalaştı.
Kiçik aynıñ 12-nde sabıq siyasiy mabüs, jurnalist Vladıslav Yesıpenko Facebook saifesinde bunı bildirdi.
"Kanalizatsiya da tıqalıp, mabüslerni boqnen buznı qırmağa mecbur eteler. Kündüzleri Rustemniñ sağlığı fenalaşqanı içün, o, 120 x 30 santimetrlik madeniy skemlede yatmaq mecbur. Keyfiyetsiz aş sebebinden o pek zayıf, amma suvuqtan çoq azap çeke, çünki kamerada ava arareti 9 dereceden ziyade köterilmey", — dep qayd etti o.
"Hizb ut-Tahrir davası"nıñ ekinci Aqyar gruppası aqqında ne bilemiz
2021 senesi arman ayınıñ 17-sinde işğal etilgen Qırımda rus quvetçileri, qırımtatarlarnıñ evlerini kütleviy olaraq tintken soñ beş qırımtatar adamını tuttılar: Aqyarnıñ Nahimov rayonından faalci Rustem Murasov ve Rustem Tayirov, Balıqlava rayonından Cebbar Bekirov, Bağçasaray rayonında faalci Zavur Abdullaev ve Aqmescit rayonından Reyif Fevziev.
O zaman Musarov ekinci kere tutuldı. Birinci kere 2016 senesi kiçik ayda tutuldı, amma birazdan azat etildi. Bu sefer ise faalci Rostov-na-Donudaki qırımtatarlarnıñ dava oturışlarından qaytqan soñ tutuldı. Öz halqınıñ temsilcilerini destek etmek maqsadınen o yerge ketti.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
