Hizb ut-Tahrir davasınıñ ekinci Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) gruppasınıñ mabüsi Rustem Murasovnı Vladimir apishanesinden Saratov vilâyetiniñ Puğaçov şeerindeki 4-nci tüzetüv müstemlekesine etap ettiler.
"Qırım birdemligi", öz menbalarına atfı etip, bunı bildirdi.
"Qırım birdemligi"niñ subetdeşiniñ aytqanına köre, şimdi Rustem Murasovnı devamlı baş ağrısı ve yüksek qan basımı raatsızlay, tedaviylenmesi içün oña ilâclar tayin etildi. Amma, müstemlekege kelgen soñ, ekim tarafından berilgen ilâclarnıñ yarısı ğayıp oldı", — dep haberde qayd etildi.
Rustem Murasov — Sevastopollı (Aqyarlı) faalcidir. 2021 senesi arman ayınıñ 17-nde Hizb ut-Tahrir davasınıñ ekinci Sevastopol (Aqyar) gruppasınıñ diger mabüslerinen beraber tutuldı.
2023 senesi mayıs ayında Rusiyeniñ Cenübiy bölgeniñ arbiy mahkemesi Murasovnı 12 yılğa mahküm etti. O yıl boş ayda istinaf mahkemesi ükümni deñiştirmedi.
"Hizb ut-Tahrir davası"nıñ ekinci Aqyar gruppası aqqında ne bilemiz
2021 senesi arman ayınıñ 17-sinde işğal etilgen Qırımda rus quvetçileri, qırımtatarlarnıñ evlerini kütleviy olaraq tintken soñ beş qırımtatar adamını tuttılar: Aqyarnıñ Nahimov rayonından faalci Rustem Murasov ve Rustem Tayirov, Balıqlava rayonından Cebbar Bekirov, Bağçasaray rayonında faalci Zavur Abdullaev ve Aqmescit rayonından Reyif Fevziev.
O zaman Musarov ekinci kere tutuldı. Birinci kere 2016 senesi kiçik ayda tutuldı, amma birazdan azat etildi. Bu sefer ise faalci Rostov-na-Donudaki qırımtatarlarnıñ dava oturışlarından qaytqan soñ tutuldı. Öz halqınıñ temsilcilerini destek etmek maqsadınen o yerge ketti.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
