Ulan-Ude şeerindeki 8-nci tüzetüv müstemlekesinde tutulğan qırımtatar siyasiy mabüsi Rustem Gugurık ağır alda buluna ve kerekli tibbiy yardım kösterilmegeni sebebinden eşitme qabiliyetini bütünley ğayıp ete bile.
Onıñ apayı Viktoriya Gugurık Qırımtatar Resurs Merkezine bunı bildirdi.
Onıñ aytqanına köre, Rustemni ceza izolâtorına yerleştirmediler, evel böyle deñişmeler muntazam sürette ve sebepsiz yapılğan edi. Aynı zamanda, müstemlekede daimiy sebepsiz teşkerüvler keçirile. Siyasiy mabüsniñ sağlıq vaziyeti kritik olıp qala.
Müstemleke şaraitinde tedaviylenmegen devamlı ağrı ve çürük sebebinden Rustem bir qulağında eşitme qabiliyetini bütünley ğayıp etti. Diger qulağı da telükede — acele tibbiy yardım kösterilmese, o, bütünley sağır ola bilir. Çoq kere ekimge barğanına baqmadan, oña yahşı tedaviylev berilmedi, kerekli ilâclar berilmedi.
Bundan ğayrı, Rustem daima yüksek qan basımı ve devamlı nefes qıtlığından şikâyet ete. Onıñ gipertoniyası içün ilâc berilmey — apayınıñ sözlerine köre, tek "qan şingendirici" ilâclar ketirile. Bundan da ğayrı, o, öz başına çıqarğan tişi köpürleri olmadan aşamaq mecbur, bu ise aşnı aşamaqnı qıyınlaştıra.
Viktoriya Gugurık bildirdi ki, küzde Rustemge yürek teşkerüvi içün holter qoyuldı, lâkin teşkerüv neticeleri ne oña, ne de tuvğanlarına berildi. Devamlı nefes qapatma hastalığınıñ sebepleri belli degil, tedaviylenmesi de imkânsız. Cenk başlanmazdan evel o, Hersonda teşkerüv ve tedaviylenüvden keçti, lâkin işğalden soñ bütün tibbiy tedbirler toqtatıldı.
Şimdilik siyasiy mabüs 80-ge yaqın insan bulunğan kamerada tutula. İçerisi nisbeten sıcaq olsa da, tışqı iklim şaraiti pek sert — minus 42 derecege qadar. Posılkalarnıñ yollanuvı qıyın: ya kelmeyler, ya da müstemlekeniñ uzaqlığı sebebinden bozulıp keleler.
Rustem Gugurık aqqında ne bilemiz
2022 senesi saban ayınıñ 27-nde FSB hadimleri onı Herson vilâyetiniñ Qırımnen memuriy sıñırında Çonğarda tuttılar.
Barışıq vaqtında çoq balalı qırımtatar adamı taksici olaraq çalışqan edi. O, insanlarnı Çongarğa alıp ketken edi. O künü, Rusiye istilâsı sebebinden, adam qorantasını Bağçasarayda tuvğanlarına alıp ketmege tırışa edi.
2016 senesi Rustem ve qardaşı Bekir Gugurık 2021 senesine qadar işğal etilgen Qırımğa kiriş yasağı aqqında haber aldılar.
Saban ayınıñ 31-nde belli oldı ki, Rusiye kontrolindeki Aqmescitniñ Kıyiv rayon makemesi Rustem Gugurıknı "Noman Çelebicihan adına göñülli batalyonda" iştirak etkeninden şübeli sayılıp, eki ayğa apiske aldı.
2022 senesi orta küz ayında Aqmescitniñ işğalli Kıyiv rayon makemesi Gugurıknı "Noman Çelebicihan adına batalyon"da iştirak etkeni içün müstemlekede 8,5 yılğa üküm etti.
Rusiye Ceza qanunnamesiniñ 208-inci maddesiniñ 2-nci qısmına binaen ("federal qanunğa uymağan silâlı birleşmede iştirak etüv") Aqmescitniñ Kıyiv rayon makemesiniñ "makemecisi" Olga Kuznetsova üküm çıqardı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
