Ukrayina mahkemesi işğal etilgen Qırımdan 59 yaşındaki teşviqatçını işbirlik ve Rusiye silâlı tecavuzını aqlağanı içün ğıyabiy şekilde mahküm etti. Ceza müddeti — 11 yıllıq azatlıqtan marum etüv, mal-mülkniñ musadere etilmesi ve 12 yıllıq muayyen vazifelerni eda etmek ve faaliyetnen oğraşmaq aqqından marum etüv.
Qırım Muhtar Cumhuriyeti prokurorlığınıñ saytında bu aqqında haber etildi.
Uquq qorçalayıcı organlarındaki bir menba Suspilne Qırımğa anonimlik şartınen söz Serğiy Veselovskıy aqqında yürsetilgenini bildirdi.
"Prokurorlar, 59 yaşındaki mahkeme etilgen adamnıñ, "Krım 24" teşviqat telekanalında öz programmasını alıp barğanını, işğalcilerniñ areketlerine açıq qol tutqanını ve Rusiye Federatsiyasınıñ istilâsını aqlağanını isbatladılar. "Mediyacı", Ukrayinağa nisbeten duşman munasebetini doğurmaq, onı Rusiye sakinleri içün telüke olaraq köstermek ve Ukratina toprağına istilânı "natsizmden azat etüv" olaraq aqlamaq maqsadınen Rusiye tarafdarı ikâyelerni faal sürette ilerilete'', — dep qayd etildi.
UHHniñ Qırım Muhtar Cumhuriyetindeki Baş idaresi taqiqatnı keçire edi ve bildirdi ki, onıñ işğal etilgen yarımadada bulunğanı sebebinden, onı mesüliyetke çekmek içün tedbirler alıp barıla.
"Mahkeme havfsızlıq hızmetiniñ taqiqatçılarınıñ toplağanları delillerge esaslanıp, onı Ukrayina Ceza qanunnamesiniñ eki maddesine istinaden qabaatlı tanıdı: 111-1 maddesiniñ 6-ncı qısmı (duşmannen işbirlik faaliyeti); 436-2 maddesiniñ 3-ünci qısmı (Rusiye Federatsiyasınıñ Ukrayinağa qarşı silâlı tecavuzını aqlav, qanuniy dep tanuv, red etüv). O, 11 yıllıq apis cezasına mahküm etildi", — dep haberde bildirildi.
Serğiy Veselovskıy aqqında ne bilemiz
"Krım 24" telekanalında "Politotdel" programmasınıñ alıp barıcısı ola, anda geosiyasetni Rusiye tarafdarları olğan mütehassıslarnen muzakere ete. "Radio Krım" canlı yayınında davetli musafir ve mütehassıs olaraq sıq-sıq çıqışta buluna. "Krım" TRK siyasiy közeticisi olaraq çalışa ve "NTS Sevastopol" kibi diger menbalarda derc etile.
2019 senesi işğalli "Qırım devlet şurası"nıñ mebuslarına saylavlarda iştirak etkende, onıñ qabarcılıq areketleri içün gizli sabıq mahkümeti olğanı aqqında malümat sebebinden bir davalı çıqtı.
Qırım işğal etilmeden evel Simferopolda (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adte) yaşay edi, cemaat faaliyetinen oğraşa edi, Rusiye ile yaqınlaşuvnı qoltutqan teşkilâtlarnıñ faali edi. Sergey Aksönovnıñ etrafına kirgen edi.
2014 senesi "QKrımskiy front" agentliginiñ onlayn çıqışınıñ tesisçilerinden biri oldı, soñra o "News Front" agentligine çevirilip, yarımada ve Donbasta teşviqatnıñ esas adamına çevirildi.
2024 senesi saban ayında Ukrayina havfsızlıq hızmeti oña Rusiye ikâyeleriniñ tarqatıluvında ve duşmannen işbirlik faaliyetinde şübe bildirdi.
"Barışuv" bazasına teşviqatçı ve Ukrayinağa qarşı Rusiye tecavuzını red etken şahıs olaraq kirsetilgen edi.
Qırım MC ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeri prokurorlığı Suspilne Qırımğa añlattı ki, qabatalanğan adam olmadan mahsus makeme oturışları ("ğıyabiy ükümler") neticesinde çıqarılğan ükümler umumiy şekilde aqqını qazanalar. Yani apellâtsiya şikâyetnamesi berilmese, apellâtsiya şikâyetnamesini berüv müddeti (üküm çıqarılğan 30 kün soñ) bitecek soñ aqqını qazanır.
Apellâtsiya şikâyetnamesi berilse ve lâğu etilmese, apellâtsiya makemesi qarar alacaq soñ üküm aqqını qazana. Aynı zamanda adam tutulğan vaqıttan berli ceza müddeti başlap sayıla.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
