Rusiye ve Ukrayina arasında esirlerni deñiştirüv çerçivesinde azat etilgen qırımtatar Eskender Kudusovnı Elvina Kudusovnıñ apayı qarşıladı. Onıñ aytqanına köre, aqayınıñ deñiştirilgeni aqqında haberni "Diia" qullanımından aldı. O, Sıspilne jurnalistlerine aqayını apishaneden beklegenini ve azatlıqtan soñ ilk subetini tarif etti.
Elvina Kudusova, "Diia"dan haber alğan soñ oña video bağı vastasınen telefon etkenini bildirdi.
"Men aqayımnen video vastasınen bağlanıp, onı beklegenimni ve quçaqlanmağa istegenimni bildirdim. Tolu miqyaslı istilâ vaqtında o maña: "Eliçka, men ormanlardan, tarlalardan keçip, seniñ yanıña kelirim", dedi. Ve oña aytqan birinci şeyim: "Sen maña ormanlardan, tarlalardan keçmege söz berdiñ, sen keldiñ". O ise: "Bir şey çoq vaqıt keçti, men seni qıdırdım, amma men keldim", — dep qadın ayttı.
Qadın, er şeyden evel, aqayını quçaqlap, onıñ balalarını köstermesini istegenini ayta.
"O, balalarını aman-aman dört yıl körmedi. Aman-aman dört yıl, ve dört yıl içinde olar bayağı büyüdiler: oğlum 14 yaşında, qızım 12 yaşında", — dep o bildirdi.
Qırımtatar asıllı ukrayin arbiy hızmetçisi 2022 senesi çiçek ayınıñ 16-nda Rusiyeniñ esiri oldı. O, Mariupol içün uruşlar vaqtında gruppanen qamaçavdan çıqmağa tırışqan edi. Elvina, Eskenderniñ esirlikte olğanını 2022 senesi mayıs ayında bilgenini ayta.
"Adamlardan biri aileme telefon etip, aqayımnen beraber esirlikte olğanını ayttı", — dep o añlattı.
Kiçik aynıñ 5-nde prezident Zelenskıy 157 ukrayinalınıñ deñiştirilüvi aqqında bildirdi. Deñiştirilgenler arasında — Silâlı quvetlerniñ, Milliy gvardiyanıñ, Devlet sıñır hızmetiniñ askerleri, vatandaşlar. Çoqusı 2022 senesinden berli esirlikte edi.
Eskender Kudusov aqqında ne bilemiz
Eskender Kudusov — 41 yaşındaki qırımtatar, ukrayin arbiy hızmetçisi, Ukrayina Silâlı quvetleriniñ baş praporşçigi. Özbekistanda sürgün etilgen qırımtatarlarnıñ qorantasında doğdı. Qırımğa qorantası 1993 senesi qaytıp oldı.
18 yaşında müddetli arbiy hızmetke kirdi, soñra orduda qaldı. İraq (2004-2005) ve Kosovoda (2009) barışıq saqlav missiyalarında iştirak etti.
2014 senesi Eskender Kudusov Feodosiyada (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adde) yerleşken deñiz piyade askerleriniñ Birinci ayrı batalyonında hızmet etken edi. O, Ukrayina antına sadıq qaldı, Rusiye tarafına keçmege red etti ve ağa-qardaşlarınen beraber Mıkolayivge tahliye etildi, anda hızmetini devam etti.
Donetsk vilâyetinde Eskender Kudusov rus ordularınıñ tolu miqyaslı istilâsını kördi. 2022 senesi çiçek ayında, Mariupol içün uruşlar vaqtında, o, dört kişiden ibaret gruppa terkibinde qamaçavdan çıqmağa tırıştı.
Rusiye tarafı Eskender Kudusovnı 25 yılğa apiske aldı, amma 2025 senesi orta küz ayında sert rejimli müstemlekedeki apis cezası 29 yıl ve 6 ayğa qadar uzatıldı. Eskenderniñ mahkeme oturışı Moskvada onıñ şahsiy iştiragi olmadan keçti, apis cezası deñiştirilmedi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
