Qırımlı vatandaş jurnalisti İrına Danılovıç, işğalli "mahkeme" tarafından qanunsız sürette 7 yılğa mahküm etilgen soñ, endi dört yıldan berli Rusiye müstemlekesinde kerekli tibbiy yardımsız buluna. Sol qulağında eşitme qabiliyeti yoq, apishanede tutuluv şaraiti ise devamlı ruhiy yorğunlıqqa ketire — müstemlekede saatlerce yüksek sesnen rus muzıkası çalına.
Qırımtatar Resurs Merkezine (QRM) yaqınları bunı bildirdiler.
Olarnıñ aytqanına köre, İrına Danılovıçnıñ eşitme qabiliyeti fenalaşqan. O, sol qulağından eşitmey. Bundan da ğayrı, qadın sıq-sıq şiddetli baş ağrıları, baş ve qulağındaki gürülti ve şivelerden şikâyet ete. Bir qaç kere muracaat etkenine baqmadan, uzun müddet devamında oña iç bir tibbiy yardım kösterilmedi, kerekli ilâclar yoq edi.
Yaqınlarınıñ aytqanına köre, İrınanıñ ahlâqiy vaziyeti pek qıyın olıp qala — bu em sağlığı, em de tutuv şaraitinen bağlıdır. Ruslar onı Zelenokumsk şeeriniñ (Rusiyeniñ Stavropol vilâyeti) 7-nci müstemlekesinde tutalar.
"Müstemlekedeki aşayt memnüniyetsiz qala, lâkin İrına özü telefon subetleri vaqtında şikâyet etmey. Bilgenimizge köre, o, sağlığı sebebinden müstemlekede çalışmay. İrına boş vaqtını esasen kitap oqup keçire, eñ az böyle imkânı bar. Ailesinen bağ, telefon sesleri vastasınen saqlanıla, eki-üç daqqa devam ete. Posılkalarnı tanışları ve göñüllileri vastasınen yollay bileler. Amma diger insanlarnıñ, şu cümleden çetelden kelgen, qol tutuv mektüpleri kelmey, çünki müstemlekeniñ memuriyeti olarnı bermey", — dep haberde qayd etildi.
Siyasit mabüsniñ yaqınları psihologik basqığa diqqat eteler, çünki müstemleke binalarında saatlerce gürültili rus muzıkası çalına, bu ise, eşitme bozuqlığı ve devamlı baş ağrısı olğan insan içün pek yaramay bir şey.
Evel siyasiy mabüsniñ babası Bronıslav Danılovıç Suspilne Qırımğa añlattı ki, Rusiye apishanesinde onıñ sol qulağında eşitme qabiliyetini coydı ve Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) SİZOsında insult keçirdi, kerekli ilâclarnı almağa imkânı olmadı, buña baqmadan baş ve qulağında ağır ağrılar ola.
"Qışta mında 400 kişi otura, 5 kolonna ve suvuq suv bar. Buz qırıp, buzlu suvnen yuvunalar. Duş almaq içün pek az vaqıt berile. Qızımnıñ aytqanına köre, "Sabun almağa vaqıtıñ olur, amma sabunı yuvmağa vaqıtıñ olmaz". Onıñ eki esas talabı — tedaviylenüv ve sanitar-turmuş şaraitidir", — dep Bronıslav Danılovıç ayttı.
İrına Danılovıç aqqında ne bilemiz
Saban ayınıñ 29-ında vaqtınca işğal etilgen Qırımda işten evge qaytqanda İrına Danılovıç ğayıp oldı. Aynı kün Kefe yanında Oy Quyu köyündeki evi tintildi. Anda ana-babaları yaşağan ediler, evini tintkende işğal quvetçileri cep telefonı ve tehnikasını alıp çıqardılar.
Bir qaç ay devamında tibbiy yardım talap etken soñ saban ayınıñ 21-inde açlıq çekmege ilân etti — izolâtorda, ayrıca keçken sene üküm çıqarılğan soñ onıñ sağlığı pek zayıfladı.
Cinaiy davasınıñ bilgilerinen tanış olıp bitirmek içün qanunsız "Kefe şeer makemesi"ne ketkende Danılovıç bayıldı. Bundan ğayrı, azaplar sebebinden açlıq ilân eter.
Çiçek ayınıñ 6-sında jurnalist açlıq bitirdi, çünki onı teşkermek ve tedaviylemek içün onı Aqamescitteki SİZOdan hastahanege alıp ketirmege söz berdiler.
Bozarğan aynıñ 29-ında işğal etilgen Qırım Yuqarı makemesi içtimaiy jurnalist ve faalci İrına Danılovıçnıñ ükümini deñiştirdi. Bundan evel patlayıcı alet saqlağanı sebebinden yedi senege malüm etildi. Apellâtsiya makemesiniñ qararına köre ceza müddeti bir ayğa azladılar.
Keçken sene boş ayda bildirildi ki, Danılovıç sanitar olmağan şartlarda buluna ve ihtiyac duyğanına baqmadan onı tedaviylemeyler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
