2025 senesi işğal etilgen Qırımda eñ az 76 sağlıq aqqı bozuluvı adisesi qayd etildi. Olardan 58-i qırımtatarlarğa qarşı.
''Qırımtatar resurs merkezi'' bu aqqında haber berdi.
"Teñeştirmek içün 2024 senesi 64 böyle adise (56-sı — qırımtatarlarğa qarşı), 2023 senesi ise 52 böyle adise (43-ü — qırımtatarlarğa qarşı) qayd etildi. Şu anda eñ az 10 saqatlı Qırım siyasiy mabüsi aqqında bilemiz. Bundan ğayrı, eñ az 28 mabüs esli-başlı insan ola ve olarnıñ içün ükümler ve tutuluv şaraiti ölüm cezası ola bilir. Yazıq ki, uyğun olmağan tutuluv şaraiti ve tibbiy yardım olmağanı sebebinden eñ az üç Qırım siyasiy mabüsi vefat etti'', — dep qayd etild.
Hatırlatamız ki, evel QRM haber berdi ki, 2025 senesi ilk qış ayı devamında işğal etilgen Qırımda eñ az yedi sağlıq aqqı bozuluvı qayd etildi.
Qara qış ayınıñ 23-nde belli oldı ki, Rusiyeniñ Kemerovo vilâyetindeki mahkeme siyasiy mabüs Yaşar Şıhametovnı sağlıq alı sebebinden müstemlekeden azat etmege red etti. Adam yürek ağrısı, büyreklerdeki taşlar ve yüksek basımdan şikayet ete. ''Qırım birdemligi'', öz menbalarına atıf etip, bu aqqında haber etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
