İşğal etilgen Qırımda ukrayinlerge qarşı repressiyalar devam ete. Hususan, bir afta içinde eki kere "devlet hainligi" içün üküm çıqarıldı, bir dava bu maddege istinaden "mahkeme"ge berildi.
Suspilne Qırım muarririyeti soñki afta devamında işğalciler tarafından yarımada sakinleriniñ siyasiy taqip etilüvi aqqında malümat topladı.
Aqyarda bir adam "devlet hainligi" içün 17 yılğa üküm etildi
Aqyarnıñ (SevastopolnıñRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) işğalci şeer mahkemesi Qırımnıñ Kezlev (Yevpatoriya) rayonınıñ 53 yaşında sakini "devlet hainligi" ve "patlayıcı aletlerniñ qanunsız saqlanması" içün 17 apis cezasına mahküm etti, dep bildirdi qara qış ayınıñ 27-nde Qırım ve Aqyar (Sevastopol) boyunca FSB işğalci idaresiniñ matbuat hızmeti.
FSB malümatına köre, aqay Ukrayina istihbaratınen işbirlik yapıp, Qırımdaki arbiy obyektlerni yoq etken ve öz başına yapılğan patlayıcı cihazınıñ qısımlarını avuştırğan.
"Aqyar (Sevastopol) şeer mahkemesi qabaatlanğan şahısnı qabaatlı tanıp, 17 yıl sert rejimli koloniyada qalmasına üküm etti, azatlıqtan marum etüv müddeti 1 yılğa sıñırlandı ve 400 biñ ruble (120 biñ ğrıvnâ — muarrir) para cezasını berdi", — dep haberde aytıla.
Aqyarnıñ (Sevastopolnıñ) işğalci prokuraturası bildire ki, aqaydan "devlet faydasına" maşna, telefon ve noutbuk tutıp alındı. Mında şunı da qayd eteler ki, onıñ İnkerman şeerinde qurğan sığınağında 1 kilogrammdan ziyade geksogen esasında patlayıcı, elektrodetonator ve radioaktiv alet tapıldı.
Qırımda 19 yaşındaki Aqmescit (Simferopol) sakinine qarşı "terroristik cinayetler" sebebinden daa bir dava açıldı
İşğalciler Qırımda 19 yaşındaki Aqmescit (Simferopol) sakinine qarşı daa bir dava açtılar, onı "terror faaliyetini kerçekleştirmek maqsadınen" (RF Ceza kodeksiniñ 205.3 maddeleri) talim keçkeninde qabaatlaylar. Onı apiske aldılar, dep bildirdi yanvarniñ 28-nde Qırım ve Aqyar boyunca Rusiye Tahqiqat komitetiniñ işğalci idaresi.
Bundan evel qırımlığa qarşı "terakt azırlağanı" içün cinaiy iş açılğan edi (RF Ceza kodeksiniñ 30-ncı maddesiniñ 1-inci qısmı, 205-inci maddesiniñ 1-inci qısmı).
"Şimdilik taqiqat, gençniñ patlav aletlerini işlep çıqarmaq maqsadınen yanıcı aletlernen oğraşqanını isbatlağan yeterli delil topladı", — dep işğalci taqiqat komitetinde qayd ettiler.
"Taqiqatnıñ" malümatına köre, yigit Aqmescitteki (Simferopoldaki) binanı ateşke bermege planlaştıra ve "cinayet aletini" azırlay edi.
"Akimiyet organlarınıñ faaliyetini kerginleştirmek maqsadınen qabaatlanğan kişi Aqmescitteki (Simferopoldaki) binanı ateşke bermege planlaştıra edi, bunıñ içün cinayet aletlerini azırladı ve tanışları arasında terroristik eylemniñ iştirakçilerini qıdırdı. Faqat, öz cinayet areketlerini soñuna qadar isbatlap olamadı, çünki olar FSB ve İçki işler nazirliginiñ hadimleri tarafından toqtatıldı", — dep haberde aytıla.
Evinde keçirilgen tintüv neticesinde "memuriyet" tarafından "tahqiqat içün müim" dep adlandırılğan şeyler tapıldı.
Canköy rayonınıñ sakini "devlet hainligi" içün 15 yılğa üküm etildi
İşğal etilgen Qırımda 1996 senesi doğğan Canköy rayonınıñ sakini "devlet hainligi" davasında 15 yılğa qadar apis cezasına mahküm etildi, dep bildirdi Qırımdaki FSB işğalci idaresi.
Rusiye uquq qoruyıcılarınıñ malümatına köre, qadın "Ukrayina istihbaratı tarafından qullanılğan" Telegram kanalına kirdi. Mında o, "Rusiye arbiy obyektleriniñ bulunğan yeri aqqında malümat toplav hızmetlerini teklif etti".
FSBde, "kuratorlarnıñ" talimatlarına köre qadın belli obyektlerge barıp, olarnı fotoğa çeke ve elde etilgen materiallarnı ukrain tarafına bere edi, dep iddia eteler. Bu, hususan, arbiy ava limanları, ava mudafaası sistemaları ve mahsus tehnika yerleştirilüvi aqqında malümat.
Bundan da ğayrı, müessiseniñ bildirgenine köre, o, "yarımada territoriyasında arbiy naqliyatnı keçirgen demir yol anbarlarınıñ areketleri aqqında malümat bere edi". Rusiye uquq qoruyıcıları qayd etkenine köre, qadınnıñ Telegram kanalını "Ukrayina Mudafaa nazirliginiñ Baş istihbarat idaresi Rusiye territoriyasında istihbarat ve bozuv faaliyeti içün qullana edi".
Qırımnıñ işğalci Yuqarı mahkemesi oña 15 yıl umumiy rejimli koloniyada apis cezasını, 100 biñ ruble (56 biñ ğrıvnâ) para cezasını, em de esas cezasını çekken soñ 1,5 yılğa azatlıqtan marum etüv cezasını berdi.
Qırımda "devlet hainliginde" qabaatlanğan Yaltalı mahkeme etildi
İşğal etilgen Qırımda Rusiye quvetçileri tarafından "devlet hainliginde" qabaatlanğan 32 yaşındaki Yalta sakini boyunca cinaiy dava açıldı, dep bildirdi yarımadanıñ işğalci prokuraturası.
Tahqiqatnıñ versiyasına köre, "mahsus arbiy ameliyatqa" qarşı çıqqan adam 2023 senesiniñ ortasında Ukrayina Mudafaa nazirliginiñ Baş istihbarat idaresiniñ vekili ile bağ tuttı". Rusiye uquq qoruyıcıları, o, "Rusiyege qarşı faaliyetke yardım etmege azır olğanını bildirdi", dep iddia ete.
Prokuraturada şunı da qayd ettiler ki, 2023 senesi boş ayında adam "kuratordan" Aqyar (Sevastopol) şeerinde arbiy tehnika yerleştirilgeni aqqında malümat toplamaq ve bermege vazife aldı.
Rusiye uquq qoruyıcılarınıñ bildirgenine köre, "davalı video çıqardı, em de Aqyarda (Sevastopolda) arbiy gemilerniñ ve Yalta civarında arbiy tehnika yerleşüviniñ planlarını çizdi".
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
