Kamçatka bölgesi boyunca federal cezalandıruv hızmeti advokat Lilâ Gemecige ağır hasta qırımtatar siyasiy mabüsi Servet Gaziyevniñ sağlığı aqqında tibbiy malümatnı bermege red etti ve onıñ II-nhci gruppa saqatlığı olmağanını bildirdi.
''Qırım birdemligi''ne qırımtatarnıñ advokatı bu aqqında haber etti.
Gemeci öz muracaatında Servet Gaziyevniñ sağlığınen ciddiy meseleler olğanını qayd etti. Hususan, 2020 senesi kiçik ayda teşkerüvniñ neticelerine esaslanıp, oña II-nci gruppa saqatlığı tayinlendi. Onıñ qız qardaşı Svitlana Ablâmitovanıñ haber etkeni kibi, apiske alınmazdan evel de, adam aile revmatizminden, içeklerniñ, aşqazannıñ, bronhlarnıñ hronik hastalıqlarını çeke edi, em de yürek hastalığı bar edi. Onı apske alğan soñ, bütün bu meseleler daa beterleşti.
2021 senesi yazda insulttan soñ Servet Gaziyevniñ bedeniniñ sağ tarafı felç oldı, şunıñ içün de o, şimdi de elini tolusınen qullanamaz.
"Onıñ parmaqları da zayıf, koordinatsiyası bozulğan, yürgende ayağını süyrekley. Yüzüniñ sağ tarafı areketsiz ve toqumalar aşağı çekilgen, bu ise insultnıñ körüniş delilidir", — dep Lilâ Gemeci qayd etti.
Advokat qırımtatarğa yürekniñ işemik hastalığı ve büyrek yetişmezligi diagnozı qoyulğanını da ayrıca qayd etti. Ve onıñ daima baş ağırtqanları ''gipertoniyanı köstere bile''.
Buña cevap olaraq, FCHniñ Kamçatka bölgesindeki bölüginiñ müdiriniñ muavini Oleg Malenkov, Servet Gaziyev apiske alınğanından berli er yıl tibbiy teşkerüvlerden keçip, umumiy praktika ekiminde cedvelde olğanını ayttı. Onıñ aytqanına köre, siyasiy mabüsni de cerrah, nevrolog, tiş ekimi, dermatolog, oftalmolog, kardiolog teşkerdiler, olar diagnozlar qoydılar, tevsiyeler berdiler, neticeler çıqardılar.
Bundan ğayrı, FCHniñ vekili Servet Gaziyevniñ ambulatoriya defterinden ve şahsiy kartotekasında saqatlığı aqqında malümat olmağanını, o, idda etilgenine köre, saqatlığını belgilemek içün ne birinci teşkerüvden, ne de yañıdan teşkerüvden keçmegenini bildirdi.
''Tibbiyet mütehassısları Gaziyevde ceza müddetini keçirmege mania olğan hastalıq olğanı aqqında netice çıqarmadılar'', — dep Oleg Malenkov qoştı. — ''Yıllıq tibbiy teşkerüvler vaqtında saqatlıq alâmetleri tapılmadı'', — dep FCHniñ Kamçatkataki bölüginiñ müdiri muavininiñ cevabında qayd etildi.
Tedaviylenmek ya da tutuvğa kelişmegen hastalıqlar boyunca tibbiy teşkerüv keçirmek ricasına cevap olaraq, Malenkov qayd etti ki, Gaziyev olarğa böyle beyanatlarnen muracaat etmedi.
''Tibbiyet mütehassısları Gaziyevde ceza müddetini keçirmege mania olğan hastalıq olğanı aqqında netice çıqarmadılar'', — dep Oleg Malenkov qoştı.
O, Liliâ Gemecige Gaziyevniñ işke alınması ve pensiyasınen bağlı vesiqalarnı bermekten de red etti. Tibbiy malümatnı yollamaq ricasına cevap olaraq, Malenkov ricanıñ mevzusınen bağlı olmağan bir noqtağa — mahkümlerniñ aqça tölengen tibbiy ve profilaktik hızmetlerni aluvına ait olğanına işaret etti.
Servet Gaziyev aqqında ne bilemiz
Servet Gaziyev 1960 senesi çiçek ayınıñ 15-nde Özbekistan ŞSC, Samarqand vilâyeti, Kaştaqurgan rayonı, İgiçkı köyünde doğdı.
PTUnı bitirgen soñ, "Taştekstilmaş"ta çalıştı. Anda bir buçuq yıl çalışqan soñ, baş miyine yaralanıp, uzun müddet tedaviylendi ve hastahanede yattı.
1988 senesi Qırımğa daimiy yaşamaq içün köçti. Gazayev, imkânı olğanı qadar, etrafındakilerge yardım ete edi. Aynı zamanda siyasiy mabüslerniñ qorantalarından olğan yalıñız analarğa yardım ete edi. Apiske alınmazdan evelki yıl devamında hasta edi ve bir yerde çalışmadı. Bazı vaqıtları qurucılıqta işler yaptı.
2019 senesi saban ayınıñ 27-nde, Aqmescitteki Kamyanka ve Stroganivka mikrorayonlarındaki qırımtatarlarnıñ evlerinde işğal etilgen Qırımda eñ büyük tintüvler keçirilgen soñ, sebepsiz qabaatlavlarnen apiske alındı.
2023 senesi qara qış ayında Rostov-na-Donudaki Cenübiy bölgeniñ arbiy makemesi Rusiye Ceza qanunnamesiniñ 205.5-nci maddesiniñ 2-nci qısmına binaen ("Terror teşkilâtınıñ faaliyetinde iştirak etüv") beş qırımtatarnı, "Hizb ut-Tahrir davası"nıñ ekinci Aqmescit gruppasınıñ 25 iştirakçisinden Servet Gaziyev, Alim Karimov, Seyran Murtazu, Erfan Osmanov ve Cemil Ğafarovnı 13 yılğa apiske aldı.
Bundan da ğayrı, Gaziyev ve Karimovğa bir yıl ve altı ayğa, digerlerine bir yılğa sıñırlav kirsetildi. Cemil Ğafarov 2023 senesi kiçik aynıñ 10-nda apiste vefat etti.
O yılnıñ ilk küz ayında Rusiye makemesi qırımtatarlarnıñ, şu cümleden elâk olğan Ğafarovnıñ ükmüni deñiştirmedi. Aynı vaqıtta birinci instantsiya makemesi terciman bermedi, Gaziyevge de terciman berilmedi ve soñki sözüni aytmağa izin berilmedi.
O, mikroinsult keçirdi, bundan soñ Gaziyevniñ sağlığı fenalaştı. Advokatı Emil Kurbedinovnıñ aytqanına köre, o, kerekli tibbiy yardım yerine tek ağrı kesici aşırlarnı aldı. Qırımtatar faalcisiniñ de teşkerüvi yapıldı, amma diagnozı aytılmadı.
"Yaramadı ve tıbbiy yardımğa muhtac olğanını aytqan Cemil ağa kibi o, bir cefakeş kibi, işkencege oğradı, genç olmağan Servet ağanıñ uzun vaqıt devamında teşkerüv ve tedaviylev keçirilmesini rica ete edi, amma bu yapılmay", — dep qayd etti advokat.
Kassatsiya basamağında makeme, Ğafarovdan ğayrı, dava mabüsleriniñ ükmüni deñiştirmedi — oña qarşı dava, reabilitatsiyadan tış sebeplerden ölüm sebebinden toqtatıldı.
2024 senesi boş ayda Gaziyevniñ sağlığı fenalaşmağa devam etkenini bildirdi. Qırımtatarnıñ tarif etkenine köre, onıñ sağ qolunda tam bir ağrı bar edi ve koordinatsiya bozulğan edi: parmaqları areket etmey, qalemni tutıp olamay edi. Em de içekler meseleleri aqqında tarif ete edi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
