2025 senesi devamında işğal etilgen Qırımda eñ az 70 arbiy oquv qayd etildi. Olarnıñ 2024 senesine köre eksilgenine baqmadan, böyle faaliyet yarımadanıñ devamlı sistemalı askerleştirilmesini köstere.
Qırımtatar resurs merkezi bunı bildirdi.
Teñeştirmek içün: 2024 senesi yarımadada böyle vaqia 124 kere, 2023 senesi ise – 40 kere, 2022 senesi ise – 20 kere olıp keçti.
QRM, oquvlar şeklinde patlavlar, ağır arbiy tehnikanıñ faal areketi, işğalli ordunıñ quvetleriniñ daima toplanması olıp keçkenini qayd etti.
QRMniñ malümatına köre, 2014 senesinden başlap Rusiye işğalcileri Qırımda sistematik sürette arbiy qouvlarnı keçireler, arbiy hızmet aqqında teşviqat yayıp, yarımada sakinlerini qanunsız sürette Rusiye Federatsiyası Silâlı quvetlerine çağıralar. Merkez böyle areketler halqara gumanitar uquqnıñ qatiy bozulmasına ve Qırımnıñ ekosistemasına tüzetilmez zarar ketirgenine qayd etile.
2025 senesi ilk qış ayında işğal etilgen Qırımda dört ev tintildi, 14 insan tutuldı, 10 insan sorğuğa ve ''subet''ke çekildi, 20 insan tevqif etildi, dep Qırımtatar Resurs Merkezi haber berdi.
QRMniñ malümatına köre, 20 tutulğan insanlardan 11-i qırımtatar. Hatırlatamız ki, QırımSOSnıñ bilgilerine köre, 2025 senesi qara qış — boş aylarında işğal etilgen Qırımda eñ az 52 ayrı cinaiy vaqia qayd etildi, olarda eñ az 66 insan zarar kördi.
Hatırlatamız ki, qara qış ayınıñ 26-na qadar işğal etilgen Qırımda RF CQniñ 20.3.3-nci — "rusiye ordusını itibardan tüşürüv" — maddesine binaen 1672 açılğan dava qayd etildi. Olarnıñ çoqusı — qadınlarğa qarşı edi.
Rusiye Ukrayinanıñ vaqtınca işğal etilgen topraqlarında muntazam sürette halqara uquqnı boza, cenkni tenqit etkenleri içün ve uydurılğan sebeplerden vatandaşlarnı kütleviy şekilde tuta. BMTnıñ İnsan aqları monitoring missiyasınıñ yolbaşçısınıñ muavini Moel Kalgunnıñ qayd etkenine köre, böyle tevqifler vaqtında işğalciler ukrayin ya da halqara qanunları yerine rusiye qanunlarına esaslanalar.
Bundan ğayrı, Rusiyede, bu añlamnıñ uquq ceetinden tam bir tarifi olmağanına baqmadan, cenkke qarşı ifadeler aqqında çaqmaq dalğası arta. Küzniñ başında anda "Rusiye Federatsiyası ordusını itibardan tüşürüv" maddeleri boyunca 1500 protokol tizildi. Ukrayina Tış istihbarat hızmeti bunı bildirdi.
Onıñ malümatına köre, 2022 senesi kiçik aydan 2025 senesi ilk qış ayına qadar RFdaki mahkemeler cenkke qarşı nazar noqtası içün 12019 memuriy ve 227 cinaiy davanı baqtı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
