Qara qış ayınıñ 26-nda işğal etilgen Qırımda RFnıñ Memuriy uquq bozuvları qanunnamesiniñ 20.3.3 maddesine istinaden — "Rusiye ordusınıñ itibarını tüşürüv" — 1 672 dava bozuluvı qayd etildi. Çoqusı qadınlarğa qarşı.
Ukrayina QMC prezidentiniñ temsilciligi bu aqqında bildire.
Mında, 1542 dava boyunca, işğalciler para cezası aqqında "qarar" çıqardılar ya da başqa maddelerge istinaden başqa bir davağa qoşuldılar ve umumiy qarar çıqardılar, dep aytıla.
"17 davasınıñ baqılması devam ete. Cinsiy mensüpligine köre, 816 (53%) qarar qadınlarnen bağlı, 724 (47%) ise erkeklernen bağlı", — dep haberde aytıla.
Hatırlatamız, Rusiye vaqtınca işğal etilgen Ukrayina topraqlarında halqara uquqnı muntazam sürette boza, cenkni tenqit etkeni ve uydurılğan qabaatlavlar sebebinden vatandaşlarnı kütleviy sürette tutıp ala. BMT insan aqları boyunca nezaret missiyasınıñ yolbaşçısınıñ muavini Noel Kalgun qayd etkenine köre, böyle tevqifler vaqtında işğalciler ukrain ve halqara qanunları yerine Rusiye qanunlarını qullana.
Bundan da ğayrı, Rusiyede cenkke qarşı çıqqanlarnen bağlı davalar arta, ve bu davalarnıñ esas meydanı işğal etilgen Qırım oldı. Yalıñız küzniñ başında yarımadada "arbiyni itibardan tüşürgen" içün 1500 protokol tizildi. Bu aqta Ukrayina tışqı istihbarat hızmeti bildire.
Olarnıñ malümatına köre, 2022 senesi kiçik aydan 2025 senesi ilk qış ayına qadar Rusiye makemeleri 12 019 memuriy ve 227 cinaiy davanı baqıp çıqtı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
