2025 senesi işğal etilgen Qırımda 10 qanunsız arheologik ekspeditsiya, em de Kalgi Sultannıñ sarayı ve Aqmescitteki (SimferopoldakiRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) Mengli Geray han camisi kibi tarihiy emiyetke saip olğan yerlerde qurucılıq qayd etildi.
"Qırımtatar resurs merkeziniñ" idare reisi Eskender Bariyev qırımtatar halqı Meclisiniñ eyyetiniñ Avstraliyanıñ Ukrayinadaki Fevqulâde ve Vekâletli Elçisi Pol Lehmannen körüşüvinde bu aqqında bildirdi.
"Altıncı tendentsiya — qanunsız arheologik qazıntılar — 2025 senesi 10 arheologik ekspeditsiya qayd etildi, em de Kalgi Sultannıñ sarayı ve Aqmescitte (Simferopolda) Mengli Geray han camisi kibi tarihiy emiyetke malik yerlerde qurucılıq, em de Aqyarda (Sevastopolda) Tavrlarnıñ eski yerleşmesinde krematoriy qurucılığı planlaştırıla. Bu tamır qırımtatar halqı içün müimdir, çünki tavrlar onıñ ecdatlarıdır", — dep haberde aytıla.
Hatırlatamız, ilk qış ayınıñ 4-nde Poloniya mahsus hızmetleri Rusiye alimi Aleksandr Butâginni, Poloniya üzerinden Felemenkten Balkanlarğa ketkende yaqaladılar. Poloniya kütleviy haber vastalarınıñ malümatına köre, o, Poloniya prokuraturası ögünde ifade bermekten vazgeçti. Onı 40 künge apiske aldılar.
İlk qış ayınıñ 23-nde Ukrayina resmiy şekilde Poloniyağa, işğal etilgen Qırımda qanunsız qazma işlerinen oğraşqanında şübheli sayılıp Varşavada tutulğan Rusiye arheologı Aleksandr Butâginniñ ekstraditsiyası aqqında muracaat yolladı.
2022 senesi Rusiye arheologı Aleksandr Butâgin işğal etilgen Qırımnıñ Keriç civarındaki qadimiy Mirmek şeerinde qazma yapqanda, Rusiyege çıqarılğan Aleksandr Makedonskiy zamanına ait 30 para hazinesini taptı. Onıñ fiyatı 8,5 million ğrıvnâden ziyadedir. İşğal etilgen Ukrayinada qanunsız çalışqanı içün şübheli olaraq ilân etildi.
Qırım Muhtar Cumhuriyetiniñ prokuraturası Suspilne Qırımğa Butâginniñ dava açılğan bir qaç arheologdan biri olğanını bildirdi: umumen yedi şübheli bar, olarnıñ arasında Qırımdaki qazmalarda iştirak etken em Rusiye, em de Ukrayina vatandaşları bar. Qırımnıñ Rusiye arheologları tarafından nasıl zapt etilgeni aqqında tafsilâtlı malümatnı maqaleden oquñız.
Qırımtatar resurs merkezi 2025 senesi yazda Qırımda qanunsız qazmalarnıñ faalleşkenini bildirgen edi. Hususan, "Hersones Tavriyskiy" müzey-qoruğında büyük "teşkerüvler" keçirile edi. Mında sadece medeniy qatlar ve Rusiyege alıp ketilgen artefaktlar degil, aynı zamanda qazma yerinde açıq teatr quruldı, dep QRM yaza.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
